បាល់ទាត់៖ ក្រុមអាស៊ីអឺរ៉ុបយូណាយធីតបានដណ្ដើមកៅអីវគ្គ ៨ក្រុមចុងក្រោយ ឬវគ្គ ១/៤ ផ្ដាច់ព្រ័ត្រនៃពានរង្វាន់សម្ដេចតេជោ ហ៊ុន សែន លើកទី១៥ (ថ្នាក់ជាតិ) ឆ្នាំ២០២១ ទាំងប្រផិតប្រផើយ បន្ទាប់ពីយកឈ្នះក្រុមម្ចាស់ផ្ទះគិរីវង់សុខសែនជ័យដោយលទ្ធផល ៣-២ កាលពីល្ងាចថ្ងៃទី១០ ខែវិច្ឆិកាម្សិលមិញ។
ជំនួបនៅកីឡដ្ឋានគិរីវង់នេះ ក្រុមភ្ញៀវអាស៊ីអឺរ៉ុបបានបើកការនាំមុខ ២គ្រាប់មុននៅវគ្គទី១ ដែលរកបានដោយកីឡាករ ឡាក់ សុភត្រា និង សាន ចំរ៉ុង មុនក្រុមម្ចាស់ផ្ទះគិរីវង់វាយបកតាមស្មើ ២-២ វិញនៅដើមវគ្គទី២ ដែលធ្វើសម្រេចដោយកីឡាករ ដាវ នីម ទាំង ២គ្រាប់នៅនាទី៤៦ និងនាទី៦៣។ នៅសល់រយៈពេលប្រមាណ ៣០នាទីចុងក្រោយ ក្រុមទាំងពីរបានបើកការសម្រុកគ្នាកាន់តែខ្លាំង ហើយក៏ស្ទើរតែឈានដល់វគ្គទាត់បាល់ប៉េណាល់ទីកាត់សេចក្ដីផងដែរ ប៉ុន្ដែដោយការបង្កកំហុសក្នុងប្រអប់គ្រោះថ្នាក់របស់ខ្សែការពារគិរីវង់ បានផ្ដល់ឱកាសមាសដល់ក្រុមអាស៊ីអឺរ៉ុបក្នុងការទាត់បាល់ពិន័យ ១១ម៉ែត្របានសម្រេចដោយកីឡាករ ព្រីង ចិត្រា នៅនាទី៩០+៦ ដែលជាគ្រាប់ជ័យជម្នះតែម្ដង។
នេះគឺជាលើកដំបូងហើយដែលក្រុមអាស៊ីអឺរ៉ុបបានឈានដល់វគ្គ ៨ក្រុមចុងក្រោយនៃពានរង្វាន់សម្ដេចតេជោ ហ៊ុន សែន បន្ទាប់ពីខកខានអស់រយៈពេល ៧ឆ្នាំបើគិតចាប់ពីឆ្នាំ២០១៤ មក។ ដូច្នេះអាស៊ីអឺរ៉ុបនឹងត្រូវបន្ដដំណើរទៅជួបក្រុមការពារតំណែងជើងឯកវិសាខានៅវគ្គ ១/៤ ផ្ដាច់ព្រ័ត្រនាថ្ងៃទី១៦ ខែវិច្ឆិកាខាងមុខ ដើម្បីប្រជែងកៅអីវគ្គពាក់កណ្ដាលផ្ដាច់ព្រ័ត្រនៃពានថ្នាក់ជាតិនេះ។ ដោយឡែកក្រុមអគ្គិសនីកម្ពុជាវិញបានទម្លាក់ក្រុមកងយោធពលខេមរភូមិន្ទ ដោយមិននឹកស្មានក្នុងលទ្ធផល ៤-០ នៅកីឡដ្ឋានស្ដាតចាស់ដើម្បីឡើងទៅក្រុមភ្នំពេញក្រោននៅវគ្គ ៨ក្រុមចុងក្រោយនាថ្ងៃទី១៦-វិច្ឆិកាខាងមុខ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
