ប្រធានាធិបតីរុស្ស៊ី លោក វ្ល៉ាឌីមៀ ពូទីន និយាយថា ប្រធានាធិបតីអ៊ុយក្រែន លោក Volodymyr Zelenskiy គ្មានសិទ្ធិអំណាចដើម្បីចូលរួមការចរចាសន្តិភាពទេ។ ប៉ុន្តែលោកពូទីន ក៏បាននិយាយថាលោកនឹងតែងតាំងអ្នកចរចា ប្រសិនបើ លោក Zelenskiy ចង់ចូលរួម។ លោកពូទីន បាននិយាយអំពីជម្លោះដែលនៅបន្តជាមួយអ៊ុយក្រែននៅក្នុងបទសម្ភាសន៍ជាមួយប្រព័ន្ធផ្សព្វផ្សាយរដ្ឋរុស្ស៊ី កាលពីថ្ងៃអង្គារនៅក្នុងតំបន់ Samara ភាគកណ្តាលរបស់ប្រទេស។

លោកនិយាយថា លោក Zelenskiy លែងជាអ្នកចរចាដែលមានសិទ្ធិទៀតហើយ ព្រោះអាណត្តិរបស់លោកបានផុតកំណត់ នៅក្នុងខែឧសភា ឆ្នាំមុន។ ប៉ុន្តែប្រសិនបើ លោក Zelenskiy មានបំណងចូលរួមក្នុងកិច្ចចរចា លោកនឹងតែងតាំងអ្នកចរចា។

ប្រធានាធិបតីរុស្ស៊ី ក៏បានបញ្ជាក់ថា ឯកសារចុងក្រោយដែលត្រូវចុះហត្ថលេខាសម្រាប់បទឈប់បាញ់ ត្រូវតែធានាសន្តិសុខទាំងប្រទេសអ៊ុយក្រែន និងរុស្ស៊ី ក្នុងលក្ខខណ្ឌនៃទស្សនវិស័យប្រវត្តិសាស្ត្រ យូរអង្វែង។

លោក និយាយថា អ៊ុយក្រែននឹងពុំមានរយៈពេលដល់មួយខែនោះទេ ប្រសិនបើការផ្គត់ផ្គង់គ្រាប់រំសេវ និងជំនួយហិរញ្ញវត្ថុត្រូវបញ្ឈប់ ដោយបញ្ជាក់ថា ប្រទេសនេះពុំអាចវាយបកមកលើរុស្ស៊ីទៀតឡើយ ប្រសិនបើជំនួយរបស់លោកខាងលិចបញ្ចប់។ អ្វីៗនឹងចប់ក្នុងរយៈពេលមួយខែកន្លះ ឬពីរខែទៀត។

ប្រធានាធិបតីអ៊ុយក្រែន និយាយថា លោក ពូទីន បានបញ្ជាក់សារជាថ្មីថា លោកខ្លាចការចរចា ខ្លាចមេដឹកនាំខ្លាំងៗ និងកំពុងធ្វើអ្វីគ្រប់យ៉ាងដែលលោកអាចធ្វើបាន ដើម្បីអូសបន្លាយពេលសង្គ្រាម។ លោកបាននិយាយបន្ថែមថា រាល់ចំណាត់ការរបស់លោក ពូទីន និងគ្រប់កលល្បិចរបស់លោក គឺមានគោលបំណងធ្វើឲ្យសង្រ្គាមគ្មានទីបញ្ចប់។