រដ្ឋមន្ត្រីការពារជាតិអូស្ត្រាលី លោក Richard Marles បាននិយាយថា លោកបានលើកឡើងអំពីសារៈសំខាន់នៃភាពជាអ្នកដឹកនាំរបស់អាមេរិក នៅក្នុងតំបន់ឥណ្ឌូ-ប៉ាស៊ីហ្វិក អំឡុងការជជែកគ្នាតាមទូរសព្ទ «ដ៏កក់ក្តៅ» ជាមួយរដ្ឋមន្ត្រីការពារជាតិអាមេរិកថ្មី លោក Pete Hegseth។

គួរបញ្ជាក់ថា សហរដ្ឋអាមេរិក គឺជាសម្ព័ន្ធមិត្តសន្តិសុខធំជាងគេរបស់ទីក្រុងកង់បេរ៉ា ហើយរដ្ឋាភិបាលកណ្តាលនិយម និងឆ្វេងនិយមរបស់លោក Anthony Albanese កំពុងប្រឹងប្រែងបន្តទំនាក់ទំនងការពារជាតិយ៉ាងជិតស្និទ្ធជាមួយរដ្ឋបាលរបស់លោក Donald Trump ចំពេលមានការព្រួយបារម្ភ អំពីការបង្កើនឥទ្ធិពលយោធារបស់ប្រទេសចិន។

លោក Hegseth ត្រូវបានបញ្ជាក់ពីការទទួលបានតួនាទីនេះ នៅក្នុងសំឡេងគាំទ្រដ៏ស្ដួចស្ដើង កាលថ្ងៃទី២៤ ខែមករា ដែលជាជ័យជម្នះដ៏សំខាន់ សម្រាប់ប្រធានាធិបតី លោក Trump។

បន្ទាប់ពីបានសន្ទនាតាមទូរសព្ទជាលើកដំបូងជាមួយលោក Hegseth លោក Marles បានប្រាប់អ្នកសារព័ត៌មានថា៖ «យើងបាននិយាយអំពីសារៈសំខាន់នៃភាពជាអ្នកដឹកនាំរបស់អាមេរិក នៅតំបន់ឥណ្ឌូ-ប៉ាស៊ីហ្វិក។ វាគឺជាការជជែកតាមទូរសព្ទដ៏ល្អ ហើយមានភាពកក់ក្តៅ និងការប្តេជ្ញាចិត្ត ដើម្បីបានឃើញភាពជាអ្នកដឹកនាំរបស់អាមេរិក នៅក្នុងតំបន់របស់យើង»។

លោក Marles បានបន្ថែមថា៖ «ភាពជាអ្នកដឹកនាំរបស់អាមេរិក បានគាំទ្រដល់សណ្តាប់ធ្នាប់ដែលមានមូលដ្ឋានលើច្បាប់សកល ចាប់តាំងពីការបញ្ចប់សង្គ្រាមលោកលើកទី២។ សម្រាប់ខ្ញុំ វាច្បាស់ណាស់ថា យើងនឹងឃើញការបន្តនូវតួនាទីនោះ នៅក្រោមរដ្ឋបាលលោក Trump»។

ជាមួយគ្នានេះ លោកបានបញ្ជាក់ថា លោក និងសមភាគីរបស់លោក ក៏បានពិភាក្សាអំពីតម្រូវការ សម្រាប់វឌ្ឍនភាព ពាក់ព័ន្ធនឹងសម្ព័ន្ធ Aukus ផងដែរ៕