នាយកទីភ្នាក់ងារអង្គការសហប្រជាជាតិទទួលបន្ទុកជនភៀសខ្លួនប៉ាឡេស្ទីន (UNRWA) នៅប្រទេសលីបង់ នៅថ្ងៃពុធ (ទី២៩ ខែមករា) នេះ បានឲ្យដឹងថា ទីភ្នាក់ងារនេះមិនរងប៉ះពាល់នោះឡើយ សម្រាប់ការបញ្ឈប់របស់ប្រធានាធិបតីអាមេរិក លោក Donald Trump ចំពោះការផ្តល់មូលនិធិជំនួយបរទេស ឬការហាមឃាត់របស់អ៊ីស្រាអែលលើប្រតិបត្តិការរបស់ខ្លួន។

នៅឯការិយាល័យមូលដ្ឋានរបស់ UNRWA ក្នុងប្រទេសលីបង់ លោកស្រី Dorothee Klaus បានប្រាប់អ្នកសារព័ត៌មានថា៖ «បច្ចុប្បន្ន UNRWA មិនទទួលបានមូលនិធិណាមួយពីសហរដ្ឋអាមេរិកទេ ដូច្នេះមិនមានផលប៉ះពាល់ដោយផ្ទាល់ពីការសម្រេចថ្មីៗ ទាក់ទងនឹងប្រព័ន្ធ UN សម្រាប់ UNRWA»។

គួរបញ្ជាក់ថា ការផ្តល់មូលនិធិរបស់សហរដ្ឋអាមេរិកដល់ UNRWA ត្រូវបានផ្អាកកាលពីឆ្នាំមុន រហូតដល់ខែមីនា ឆ្នាំ២០២៥ ក្រោមកិច្ចព្រមព្រៀងដែលសម្រេចឡើងដោយសមាជិកសភាអាមេរិក ហើយបន្ទាប់ពីអ៊ីស្រាអែល បានចោទប្រកាន់មនុស្ស ១២រូបនៃបុគ្គលិក ១៣.០០០នាក់របស់ទីភ្នាក់ងារ នៅតំបន់ហ្កាហ្សាថា បានចូលរួមក្នុងការវាយប្រហារបង្ហូរឈាម កាលពីថ្ងៃទី៧ ខែតុលា ឆ្នាំ២០២៣ ដោយក្រុមហាម៉ាស ដែលបង្កឲ្យមានសង្រ្គាម នៅហ្កាហ្សា។

អង្គការសហប្រជាជាតិ (UN) បានឲ្យដឹងថា ខ្លួនបានបណ្តេញបុគ្គលិក UNRWA ចំនួន ៩នាក់ ដែលប្រហែលជាជាប់ពាក់ព័ន្ធនឹងការវាយប្រហារនេះ ហើយបានប្រាប់ទៀតថា ខ្លួននឹងស៊ើបអង្កេតរាល់ការចោទប្រកាន់ដែលបានធ្វើឡើង។

ជាមួយគ្នានេះ លោកស្រី Klaus បាននិយាយថា UNRWA នៅលីបង់ ក៏បានដាក់បុគ្គលិក ៤រូបឲ្យឈប់សម្រាករដ្ឋបាលផងដែរ ខណៈដែលខ្លួនស៊ើបអង្កេតលើការចោទប្រកាន់ ដែលថា ពួកគេបានបំពានគោលការណ៍អព្យាក្រឹតរបស់ UN៕