ប្រធានាធិបតីអាមេរិក លោក Donald Trump បានចុះហត្ថលេខាលើក្រឹត្យមួយកាលពីថ្ងៃពុធ (២៩ មករា) ដើម្បីប្រយុទ្ធប្រឆាំងនឹងទំនោរប្រឆាំងជនជាតិជ្វីហ្វ ហើយសន្យាថានឹងលុបចោលទិដ្ឋាការ និងនិរទេសនិស្សិតមហាវិទ្យាល័យណាដែលមិនមែនជាពលរដ្ឋអាមេរិក និងអ្នកផ្សេងទៀតដែលបានចូលរួមក្នុងការតវ៉ាគាំទ្រប៉ាឡេស្ទីន។

បទបញ្ជានៅលើក្រឹត្យសន្យាថានឹង "ចាត់វិធានការជាបន្ទាន់" ដោយក្រសួងយុត្តិធម៌ដើម្បីកាត់ទោស "ការគំរាមកំហែងភេរវកម្ម ការដុតបំផ្លាញដោយចេតនា ការបំផ្លិចបំផ្លាញ និងអំពើហិង្សាលើជនជាតិជ្វីហ្វនៅអាមេរិក" និងប្រើប្រាស់គ្រប់ធនធានសហព័ន្ធដើម្បីប្រយុទ្ធប្រឆាំងនឹងអ្វីដែលហៅថា "ការផ្ទុះឡើងនៃទំនោរប្រឆាំងជនជាតិជ្វីហ្វនៅតាមបរិវេណសាលា និងតាមដងផ្លូវរបស់អាមេរិក" ចាប់តាំងពីថ្ងៃទី០៧ ខែតុលា ឆ្នាំ២០២៣ នៃការវាយប្រហារលើអ៊ីស្រាអែល ដោយក្រុមអ៊ីស្លាមប៉ាឡេស្ទីនហាម៉ាស។

លោក Trump បាននិយាយក្នុងក្រឹត្យនោះថា "ជូនចំពោះជនបរទេសស្នាក់នៅអាមេរិកទាំងអស់ដែលបានចូលរួមក្នុងការតវ៉ាគាំទ្រក្រុមជីហាដឥស្លាម យើងជូនដំណឹងដល់អ្នកថា ឆ្នាំ២០២៥នេះ យើងនឹងស្វែងរកអ្នក ហើយនឹងនិរទេសអ្នកចេញ"។ លោកប្រធានាធិបតីរូបនេះបន្ថែមថា "យើងក៏នឹងលុបចោលទិដ្ឋាការសិស្សរបស់អ្នកអាណិតអាសូរក្រុមហាម៉ាសទាំងអស់នៅក្នុងបរិវេណមហាវិទ្យាល័យផងដែរ"។

ក្រុមសិទ្ធិមនុស្ស និងអ្នកច្បាប់បាននិយាយថា វិធានការថ្មីនេះនឹងរំលោភលើសិទ្ធិបញ្ចេញមតិដោយសេរីតាមរដ្ឋធម្មនុញ្ញ ហើយទំនងជានឹងធ្វើឱ្យមានការប្រឈមមុខផ្នែកច្បាប់ជាបន្តបន្ទាប់៕