យោងតាមរបាយការណ៍មួយចេញផ្សាយនៅថ្ងៃព្រហស្បតិ៍ (៣០ មករា) នេះបានបង្ហាញថា អំពើចោរកម្ម និងហិង្សាលើបុគ្គលិកលក់រាយក្នុងចក្រភពអង់គ្លេស បានកើនឡើងខ្លាំងបំផុតមិនធ្លាប់មានដល់កម្រិតកំណត់ត្រាកាលឆ្នាំមុន ហើយ "មិនអាចគ្រប់គ្រងបាន" ដែលជំរុញដោយក្រុមឧក្រិដ្ឋជនអន្ធពាល។

ការស្ទង់មតិឧក្រិដ្ឋកម្មប្រចាំឆ្នាំរបស់សម្ព័ន្ធលក់រាយរបស់ចក្រភពអង់គ្លេស ឬហៅថា BRC បានរកឃើញថា ឧប្បត្តិហេតុនៃចោរកម្មច្រើនជាង ២០លានដងត្រូវបានប្រព្រឹត្តនៅក្នុងឆ្នាំមុនដល់ថ្ងៃទី៣១ ខែសីហា ឆ្នាំ២០២៤ ដែលស្មើនឹង ៥៥.០០០ករណីក្នុងមួយថ្ងៃ ដែលធ្វើឱ្យអ្នកលក់រាយខាតបង់សរុប ២,២ពាន់លានផោន (២,៧ពាន់លានដុល្លារ)។

ក្នុងឆ្នាំ២០២៣ មានឧប្បត្តិហេតុបែបនេះចំនួន ១៦លានករណី។ សម្ព័ន្ធលក់រាយ BRC បាននិយាយថា ឧប្បត្តិហេតុជាច្រើនទៀតនៅក្នុងរយៈពេលចុងក្រោយនេះ ត្រូវបានផ្សារភ្ជាប់ទៅនឹងឧក្រិដ្ឋជនមានអង្គការចាត់តាំង ដោយក្រុមជនអន្ធពាលបានដាក់គោលដៅជាប្រព័ន្ធលើហាងនានានៅទូទាំងប្រទេស។

ឧប្បត្តិហេតុនៃអំពើហឹង្សា និងការរំលោភបំពានក្នុងឆ្នាំ២០២៣/២៤ បានកើនឡើងដល់ជាង ២.០០០ករណីក្នុងមួយថ្ងៃ លើសពីតួលេខ ១.៣០០ករណីកាលពីឆ្នាំមុននោះ។ របាយការណ៍បង្ហាញថា ការពេញចិត្តចំពោះការឆ្លើយតបរបស់នគរបាលលើឧប្បត្តិហេតុនេះនៅតែមានកម្រិតទាប ហើយចំនួនទឹកប្រាក់ដែលចំណាយលើការទប់ស្កាត់ឧក្រិដ្ឋកម្មក៏ឈានដល់កម្រិតខ្ពស់ផងដែរ ដោយអ្នកលក់រាយបានវិនិយោគ ១,៨ពាន់លានផោន លើវិធានការដូចជា កាមេរ៉ាសុវត្ថិភាព បុគ្គលិកសន្តិសុខ និងឧបករណ៍ប្រឆាំងចោរកម្មនានា ដោយកើនឡើងពីតួលេខ ១,២ពាន់លានផោនក្នុងឆ្នាំ២០២២/២៣៕