ប្រធានក្រុមប្រឹក្សាអន្តរកាលរបស់ប្រទេសហៃទី លោក Leslie Voltaire បាននិយាយនៅក្នុងបទសម្ភាសន៍មួយកាលពីថ្ងៃពុធ (២៩ មករា) ថា កាលបរិច្ឆេទសម្រាប់ការបោះឆ្នោតសកលដែលរង់ចាំជាយូរមកហើយរបស់ប្រទេសសមុទ្រការ៉ាអ៊ីបមួយនេះ ត្រូវបានកំណត់នៅអំឡុងថ្ងៃទី១៥ ខែវិច្ឆិកា នៃឆ្នាំនេះ។

ហៃទី ខ្វះអ្នកតំណាងរាស្រ្តជាប់ឆ្នោតតាំងតែពីខែមករា ឆ្នាំ២០២៣ ហើយមិនបានរៀបចំការបោះឆ្នោតទេចាប់តាំងពីឆ្នាំ២០១៦ មក។ រដ្ឋធានីរបស់ប្រទេសនេះត្រូវបានគ្រប់គ្រងស្ទើរតែទាំងស្រុងដោយក្រុមជនអន្ធពាលប្រដាប់អាវុធ ហើយថ្នាក់មេដឹកនាំនិយាយថា សន្តិសុខត្រូវតែត្រូវបានបង្កើតឡើងជាមុនសិន ដើម្បីរៀបចំការបោះឆ្នោតដោយសេរី និងយុត្តិធម៌បាន។

លោក Voltaire បានលើកឡើងថា "យើងត្រូវតែផ្ទេរអំណាចឱ្យរដ្ឋាភិបាលជាប់ឆ្នោតស្របច្បាប់នៅថ្ងៃទី០៧ ខែកុម្ភៈ ឆ្នាំ២០២៦" ដោយសំដៅទៅលើដែនកំណត់នៃរដ្ឋធម្មនុញ្ញ ដែលមិនត្រូវអើពើម្តងហើយម្តងទៀត ខណៈរដ្ឋាភិបាលនានាបានលើកឡើងពីផលលំបាកក្នុងការរៀបចំការបោះឆ្នោតក្រោមវិបត្តិសន្តិសុខកាន់តែអាក្រក់បែបនេះ។

ប្រជាជនហៃទីជាង ១លាននាក់ ត្រូវភៀសខ្លួនខាងក្នុងដោយសារតែជម្លោះ ហើយប្រហែលពាក់កណ្តាលនៃចំនួនប្រជាជនសរុប - ជាង ៥លាននាក់ - កំពុងស្រេកឃ្លាន ខណៈក្រុមជនអន្ធពាលប្រដាប់អាវុធសម្ព័ន្ធមិត្ត បានដណ្តើមយកទឹកដីជុំវិញរដ្ឋធានី និងនៅក្នុងតំបន់កសិកម្មសំខាន់ៗ ដោយបង្ខំឱ្យកំពង់ផែជាច្រើនបិទប្រតិបត្តិការរបស់ពួកគេម្តងហើយម្តងទៀត៕