ភាពសប្បាយរីករាយរបស់ប្រជាជនភៀសខ្លួនប៉ាឡេស្ទីនរាប់ម៉ឺនគ្រួសារដែលបានត្រលប់ទៅផ្ទះសម្បែងវិញនៅភាគខាងជើងតំបន់ហ្កាហ្សា បន្ទាប់ពីបទឈប់បាញ់ជាមួយអ៊ីស្រាអែល កំពុងប្រែក្លាយជាក្ដីទុក្ខ និងភាពអស់សង្ឃឹម ដោយសារការពិតដ៏ឃោរឃៅនៃទីតាំងដែលមិនអាចរស់នៅបាន សំណល់ទម្លាក់គ្រាប់បែកក្នុងផ្ទះសម្បែង និងកង្វះខាតការផ្គត់ផ្គង់មូលដ្ឋានយ៉ាងធ្ងន់ធ្ងរ។

មនុស្សជាច្រើនបានចាប់ផ្តើមត្អូញត្អែរពីកង្វះទឹកដែលបង្ខំឱ្យពួកគេតម្រង់ជួរជាច្រើនម៉ោងដើម្បីបំពេញធុងប្លាស្ទិកសម្រាប់ផឹក ឬសម្អាត។ ជាមួយនឹងលំនៅឋានភាគច្រើនឥឡូវនេះមានតែគំនរកម្ទេចថ្ម អ្នកស្រុកនាំគ្នារកវត្ថុមានប្រយោជន៍នៅសល់ពីទ្រព្យសម្បត្តិរបស់ពួកគេ ដើម្បីសង់តង់បណ្តោះអាសន្ន។

នៅពេលយប់ តំបន់លំនៅឋានដែលត្រូវបានបំផ្លាញដោយការវាយប្រហារតាមអាកាសរបស់អ៊ីស្រាអែល និងការបាញ់ផ្លោង បានធ្លាក់ចូលទៅក្នុងភាពងងឹត ដោយសារតែការខ្វះអគ្គិសនី ឬប្រេងសម្រាប់ដំណើរការម៉ាស៊ីនភ្លើងដែលមានស្រាប់។

គិតត្រឹមល្ងាចថ្ងៃអង្គារ (២៨ មករា) អាជ្ញាធរក្រុមហាម៉ាសរបស់ដែនដីហ្កាហ្សាបាននិយាយថា ភាគច្រើននៃមនុស្ស ៦៥០.០០០នាក់ដែលបានភៀសខ្លួនពីភាគខាងជើងដោយសារសង្រ្គាម បានចូលក្នុងទីក្រុងហ្កាហ្សាឡើងវិញ និងជាយខាងជើងនៃតំបន់ហ៊ុមព័ទ្ធពីកន្លែងនានាទៅភាគខាងត្បូង ជាទីដែលងការប្រយុទ្ធមិនសូវខ្លាំងក្លា និងមានការបំផ្លិចបំផ្លាញតិចតួច៕