អាជ្ញាធរសុខាភិបាលដែលមានមូលដ្ឋាននៅដែនដីហ្កាហ្សា បានរាយការណ៍នៅក្នុងសេចក្តីថ្លែងការណ៍មួយកាលពីថ្ងៃពុធ (២៩ មករា) ថា ចំនួនអ្នកស្លាប់របស់ជនជាតិប៉ាឡេស្ទីន នៅតំបន់ហ្កាហ្សា ចាប់តាំងពីថ្ងៃទី០៧ ខែតុលា ឆ្នាំ២០២៣ មក បានកើនឡើងដល់ ៤៧.៤១៧នាក់ និង ១១១.៥៧១នាក់ផ្សេងទៀតបានរងរបួស។

ទោះបីជាដំណាក់កាលដំបូងនៃកិច្ចព្រមព្រៀងបទឈប់បាញ់ហ្កាហ្សា កំពុងត្រូវបានអនុវត្តតាមការគ្រោងទុកក៏ដោយ ក៏ចំនួនអ្នកស្លាប់នៅក្នុងតំបន់ហ៊ុមព័ទ្ធនេះនៅតែបន្តកើនឡើង។

យោងតាមអាជ្ញាធរសុខាភិបាលបានឱ្យដឹងថា ក្នុងរយៈពេល ២៤ម៉ោងកន្លងមកនោះ ជនជាតិប៉ាឡេស្ទីន ២នាក់ត្រូវបានសម្លាប់នៅក្នុងឡោមព័ទ្ធដោយយោធាអ៊ីស្រាអែល បើទោះបីជាមានបទឈប់បាញ់ក៏ដោយ ខណៈមនុស្ស ២នាក់ផ្សេងទៀតបានបាត់បង់ជីវិតដោយសាររបួសនៅមុននេះ ហើយសាកសពចំនួន ៥៩នាក់ត្រូវបានរកឃើញពីគំនរបាក់បែក។

លោក Mahmoud Basal ប្រធានសេវាសង្រ្គោះប៉ាឡេស្ទីន បាននិយាយថា ប្រតិបត្តិការជីករកសាកសពត្រូវប៉ះពាល់ដោយខ្វះកម្លាំង និងគ្រឿងចក្រធុនធ្ងន់ ខណៈប៉ាន់ប្រមាណថា សាកសពជនជាតិប៉ាឡេស្ទីនប្រហែល ១០.០០០នាក់ដែលត្រូវបានសម្លាប់ក្នុងសង្រ្គាម មិនទាន់រកឃើញនៅឡើយទេ៕