ប្រព័ន្ធផ្សព្វផ្សាយ CNN បានរាយការណ៍ថា សពចំនួនរហូតដល់ទៅ ១៩នាក់ ត្រូវបានស្រង់ចេញពីទន្លេ Potomac បន្ទាប់ពីយន្តហោះរបស់ក្រុមហ៊ុនអាកាសចរណ៍ American Airlines ធ្លាក់នៅទីក្រុងវ៉ាស៊ីនតោនឌីស៊ី។ ហើយទំនងមានសពច្រើនទៀតជាប់នៅក្នុងបំណែកកម្ទេចកម្ទីរបស់យន្តហោះ ដែលបានលិចនៅក្នុងទន្លេនេះ។

គួរបញ្ជាក់ថា យន្តហោះរបស់ក្រុមហ៊ុនអាកាសចរណ៍ American Airlines ដែលបានបានបុកជាមួយឧទ្ធម្ភាគចក្ររបស់កងទ័ពអាមេរិក កាលពីថ្ងៃពុធ (ទី២៩ ខែមករា) មានអ្នកដំណើរចំនួន ៦០នាក់ និងសមាជិកអាកាសយានិក ៤នាក់។ សារព័ត៌មាន CNN បានឲ្យដឹងបន្ថែមថា ទាហាន ៣នាក់ បានជិះនៅលើឧទ្ធម្ភាគចក្រ Black Hawk ដែលកំពុងហោះហើរហ្វឹកហាត់។ ឧបទ្ទវហេតុធ្លាក់យន្តហោះនេះ ត្រូវបានថតជាប់ជារូបភាពវីដេអូដោយកាមេរ៉ាសុវត្ថិភាព CCTV នៅមជ្ឈមណ្ឌល Kennedy។

បន្ទាប់ពីសេចក្តីថ្លែងការណ៍ដំបូង អំពីដំណឹងសង្ខេបនៃឧបទ្ទវហេតុនេះ ប្រធានាធិបតីសហរដ្ឋអាមេរិក លោក Donald Trump បានឡើងទៅកាន់គេហទំព័របណ្ដាញសង្គម Truth Social ភ្លាមៗ ដោយលើកឡើងថា យន្តហោះនោះកំពុងដំណើរការយ៉ាងល្អ ដែលបានន័យថា យន្តហោះមិនមានបញ្ហាបច្ចេកទេសនោះឡើយ។ តែយ៉ាងណាក្ដី លោកហាក់ដូចជាបានទម្លាក់កំហុសទៅលើឧទ្ធម្ភាគចក្ររបស់កងទ័ពអាមេរិក ជុំវិញគ្រោះថ្នាក់នេះ៕