លោកប្រធានាធិបតី Donald Trump បានបង្ហើបឡើងដោយគ្មានភស្តុតាងកាលពីថ្ងៃព្រហស្បតិ៍ (៣០ មករា) ថា ការបុកគ្នានៅកណ្តាលអាកាសនៃយន្តហោះពីរគ្រឿងនៅក្នុងទីក្រុងវ៉ាស៊ីនតោន គឺជាលទ្ធផលនៃកិច្ចខិតខំប្រឹងប្រែងរបស់រដ្ឋបាលអាកាសចរណ៍សហព័ន្ធ FAA ក្នុងការជួលកម្លាំងពលកម្មចម្រុះជំនាញឱ្យកាន់តែច្រើន។

លោក Trump បានបង្កើនការចោទប្រកាន់របស់ខ្លួននៅក្នុងសន្និសីទសារព័ត៌មានមួយនៅសេតវិមាន ដែលអំពាវនាវឱ្យធ្វើបច្ចុប្បន្នភាពដល់ប្រជាជនអាមេរិកពីគ្រោះថ្នាក់កាលពីយប់ថ្ងៃពុធ ដែលយន្តហោះដឹកអ្នកដំណើរមួយគ្រឿងហៀបនឹងចុះចតនៅអាកាសយានដ្ឋានជាតិ Reagan បុកជាមួយឧទ្ធម្ភាគចក្រកងទ័ពនៅលើអាកាសដែលកំពុងហ្វឹកហាត់ ដោយសម្លាប់មនុស្សទាំង ៦៧នាក់លើយន្តហោះទាំងពីរ។

មូលហេតុនៃការធ្លាក់យន្តហោះនេះ មិនទាន់ដឹងច្បាស់នៅឡើយទេ ហើយក៏មិនមានភស្តុតាងណាមួយដែលបង្ហាញថា កិច្ចខិតខំប្រឹងប្រែងរបស់សហព័ន្ធដើម្បីធ្វើឱ្យកម្លាំងការងារកាន់តែមានភាពចម្រុះជំនាញបានធ្វើឱ្យប៉ះពាល់ដល់សុវត្ថិភាពផ្លូវអាកាសនោះដែរ។ ប៉ុន្តែលោកTrump បានប្រើការថ្លែងសង្ខេបនេះដើម្បីបង្កើនវោហាសាស្ត្ររបស់ខ្លួនលើបញ្ហានេះ ដោយរិះគន់រដ្ឋបាលអាកាសចរណ៍ FAA ដែលគ្រប់គ្រងការធ្វើដំណើរតាមផ្លូវអាកាសរបស់សហរដ្ឋអាមេរិក។

ការអត្ថាធិប្បាយរបស់លោក Trump បានទាក់ទាញការរិះគន់ជាច្រើនពីអ្នកជំនាញសុវត្ថិភាពអាកាសចរណ៍ អ្នកតស៊ូមតិសិទ្ធិជនពិការ និងសមាជិកសភាបក្សប្រជាធិបតេយ្យ។ មិនមានអ្នករស់រានមានជីវិតទេក្នុងចំណោមមនុស្ស ៦៤នាក់នៅលើយន្តហោះ និងទាហាន ៣នាក់នៅលើឧទ្ធម្ភាគចក្រ ដែលធ្វើឱ្យសោកនាដកម្មនេះជាគ្រោះមហន្តរាយផ្លូវអាកាសដ៏អាក្រក់បំផុតរបស់អាមេរិក ក្នុងពេលជាង ២០ឆ្នាំ៕