ក្រុមហ៊ុនសាមសុង អេឡិចត្រូនិក (Samsung Electronics) នៅថ្ងៃសុក្រ (៣១ មករា) នេះ បានព្រមានពីការលក់ធ្លាក់ចុះនៃបន្ទះឈីបឆ្លាតវៃបញ្ញាសិប្បនិម្មិត AI របស់ខ្លួននៅក្នុងត្រីមាសបច្ចុប្បន្ន ដោយសារតែការរឹតបន្តឹងការនាំចេញរបស់សហរដ្ឋអាមេរិក ទៅកាន់ប្រទេសចិន ខណៈដែល Samsung កំពុងធ្វើការឆ្ពោះទៅរកការបញ្ចេញកំណែប្រសើរឡើងនៃបន្ទះឈីបកម្រិតខ្ពស់របស់ខ្លួន។

បន្ទះឈីបកម្រិតខ្ពស់ដែលប្រើសម្រាប់ AI គឺជាចំណុចដ៏ក្ដៅគគុកនៅក្នុងទីផ្សារដ៏ទន់ខ្សោយនៃបន្ទះឈីបអង្គចងចាំ ដោយក្រុមហ៊ុនគូប្រជែង SK Hynix គឺអ្នកផ្គត់ផ្គង់សំខាន់នៃបន្ទះឈីបអង្គចងចាំកម្រិតបញ្ជូនខ្ពស់ HBM សម្រាប់ក្រុមហ៊ុនអាមេរិក Nvidia ដែលប្រើនៅក្នុងអង្គភាពដំណើរការក្រាហ្វិក AI ហើយ Samsung បានជួបការលំបាកដើម្បីបំពេញតាមតម្រូវការរបស់ Nvidia។

សហរដ្ឋអាមេរិក នៅក្នុងខែធ្នូ បានបើកការបង្ក្រាបថ្មីលើឧស្សាហកម្មបន្ទះឈីបពាក់កណ្ដាលចម្លងរបស់ចិន រួមទាំងដាក់កម្រិតលើការលក់បន្ទះឈីប HBM ផងដែរ។ ក្រុមហ៊ុន Samsung ដែលពឹងផ្អែកខ្លាំងលើអតិថិជនចិនសម្រាប់ប្រហែល ២០% នៃការលក់ឈីប HBM ត្រូវរំពឹងថានឹងរងផលប៉ះពាល់ខ្លាំងជាងដៃគូរបស់ខ្លួន នេះបើយោងតាមអ្នកវិភាគ។

ក្រុមហ៊ុន Samsung បានបញ្ជាក់ថា ប្រាក់ចំណេញប្រតិបត្តិការរបស់ខ្លួនមានចំនួន ៦,៥សែនកោដិ៍វ៉ុន (៤,៤៨ពាន់លានដុល្លារ) នៅក្នុងត្រីមាសទី៤ ឆ្នាំមុន ដោយធ្លាក់ចុះ ២៩% ធៀបនឹងត្រីមាសទីបី៕