បាល់ទាត់៖ ក្រុមបាល់ទាត់ជំរើសជាតិវៀតណាមនៅសល់ឱកាសស្ដួចស្ដើងបំផុត ដើម្បីឆ្លងផុតវគ្គជំរុះដើម្បីមានមុខនៅ World Cup ២០២២ ប្រទេសកាតា។ ជាក្រុមតែមួយគត់នៅតំបន់អាស៊ីអាគ្នេយ៍ដែលឡើងមកកាន់ជុំទី៣ នេះ វៀតណាមមិនរុញរាឡើយក្នុងការរកពិន្ទុដំបូងរបស់ខ្លួន។ ក្រុមរបស់លោក Park Hang-seo បានឡើងមកកាន់ជុំទី៣ នេះគឺជាសមិទ្ធផលអស្ចារ្យរួចទៅហើយ ទោះបីរកមិនបានមួយពិន្ទុសោះក្រោយ ៤ប្រកួតកន្លងទៅ។
គ្មានប្រកួតណាដែលវៀតណាមគ្មានការងារធ្ងន់ឡើយ ខណៈក្រុមដែលឡើងមកដល់វគ្គនេះ សុទ្ធតែជាក្រុមដែលមានបទពិសោធន៍ច្រើនលើកច្រើនសារមកហើយទាំងនៅជុំនេះ និងការបង្ហាញខ្លួននៅ World Cup។ ជាក់ស្ដែងយប់នេះវៀតណាមនឹងត្រូវទទួលក្រុមសាមូរ៉ៃជប៉ុននៅទីក្រុងហាណូយ។ វៀតណាមមិនដែលឈ្នះជប៉ុនឡើយក្នុងជំនួប ៣លើកដែលធ្លាប់ជួបគ្នា។ ជប៉ុនកំពុងស្រែកឃ្លានពិន្ទុខ្លាំងក្នុងពូល B នេះបន្ទាប់ពីពួកគេចាប់ផ្ដើមមិនបានល្អពោលគឺ ៤ប្រកួតឈ្នះ ២ ចាញ់ ២ មានតែ ៦ពិន្ទុឈរលេខ ៤ ក្នុងពូល។ ចំណែកវៀតណាមគ្មានពិន្ទុរាប់ឡើយក្រោយចាញ់ទាំង ៤ប្រកួតកន្លងទៅរួមមានចាញ់អារ៉ាប៊ីសាអ៊ូឌីត ៣-១, ចាញ់អូស្ត្រាលី ១-០, ចាញ់ចិន ៣-២ និងចាញ់អូម៉ង់ ៣-១។ បន្ទាប់ពីជួបជប៉ុន វៀតណាមនឹងបន្តការងារធ្ងន់របស់ខ្លួនទទួលភ្ញៀវអារ៉ាប៊ីសាអ៊ូឌីត ដែលជាក្រុមនាំមុខគេក្នុងពូលមាន ១២ពិន្ទុពីជ័យជំនះទាំង ៤ប្រកួត៕
អត្ថបទ៖នាង សុភាវុធ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
