អាជ្ញាធរការពារទិន្នន័យរបស់ប្រទេសអ៊ីតាលី កាលពីថ្ងៃព្រហស្បតិ៍ (ទី៣០ ខែមករា) បានប្រាប់ឲ្យដឹងថា ស្ថាប័នបានរាំងខ្ទប់គំរូបញ្ញាសិប្បនិម្មិត (AI) នៃក្រុមហ៊ុនបណ្ដាញ DeepSeek របស់ប្រទេសចិន ដោយសារការខ្វះខាតព័ត៌មាន ស្តីពីការប្រើប្រាស់ទិន្នន័យផ្ទាល់ខ្លួន។

បច្ចេកវិទ្យារបស់ DeepSeek មិនអាចចូលប្រើប្រាស់បាននោះឡើយ កាលពីថ្ងៃទី២៩ ខែមករា នៅក្នុងកម្មវិធីរបស់ Apple ឬ Google ក្នុងប្រទេសអ៊ីតាលី ពោលគឺមួយថ្ងៃបន្ទាប់ពីអាជ្ញាធរដែលត្រូវបានគេស្គាល់ថា Garante បានស្នើសុំព័ត៌មានអំពីការប្រើប្រាស់ទិន្នន័យផ្ទាល់ខ្លួនរបស់បច្ចេកវិទ្យានេះ។

ជាពិសេស ស្ថាប័នចង់ដឹងថា តើទិន្នន័យផ្ទាល់ខ្លួនត្រូវបានប្រមូលពីប្រភពណា ក្នុងគោលបំណងអ្វី ផ្អែកលើមូលដ្ឋានច្បាប់អ្វី និងថា តើវាត្រូវបានរក្សាទុកនៅក្នុងប្រទេសចិនដែរ ឬទេ។

តាមរយៈគេហទំព័ររបស់ខ្លួន អាជ្ញាធរបានឲ្យដឹងថា ការសម្រេចរបស់អាជ្ញាធរ ដែលមានគោលបំណងការពារទិន្នន័យរបស់អ្នកប្រើប្រាស់អ៊ីតាលី បានធ្វើឡើងបន្ទាប់ពីក្រុមហ៊ុនចិនដែលផ្គត់ផ្គង់សេវាកម្មបច្ចេកវិទ្យាដល់ DeepSeek បានផ្តល់ព័ត៌មាន ដែល «ត្រូវបានចាត់ទុកថា មិនទាន់គ្រប់គ្រាន់ទាំងស្រុង»។

អជា្ញធរ Garante បានបន្ថែមថា ការសម្រេចមាន «ចូលជាធរមានភ្លាមៗ» ហើយខ្លួនក៏បានបើកការស៊ើបអង្កេតផងដែរ។ DeepSeek មិនបានឆ្លើយតបភ្លាមៗនោះឡើយ ចំពោះសំណើរបស់សារព័ត៌មាន Reuters ដើម្បីសុំការអត្ថាធិប្បាយ៕