រដ្ឋបាលរបស់លោកប្រធានាធិបតី Donald Trump ជាការផ្លាស់ប្តូរដែលមិនធ្លាប់មានពីមុនមក កាលពីល្ងាចថ្ងៃសុក្រ (ទី៣១ ខែមករា) បានប្រកាសថា ខ្លួននឹងដកស្ថាប័នប្រព័ន្ធផ្សព្វផ្សាយចំនួន ៤ ក្នុងនោះរួមទាំង New York Times ផងដែរ ចេញពីការិយាល័យផ្ទាល់ខ្លួនរបស់ពួកគេ នៅក្នុងមន្ទីរបញ្ចកោណ ដោយលើកឡើងពីគោលបំណងចង់ផ្ដល់ឱកាសឲ្យបណ្ដាញសារព័ត៌មានផ្សេងម្ដង។

ជាមួយគ្នានេះ អនុស្សរណៈ ស្តីពី «កម្មវិធីផ្លាស់ប្ដូរប្រព័ន្ធផ្សព្វផ្សាយប្រចាំឆ្នាំថ្មី» បានឲ្យដឹងថា ស្ថាប័នក៏នឹងដកផងដែរនូវប្រព័ន្ធផ្សព្វផ្សាយ National Public Radio, NBC News ដែលជាកម្មសិទ្ធិរបស់ក្រុមហ៊ុន Comcast Corp និង Politico ដែលត្រូវតែចាកចេញត្រឹមថ្ងៃទី១៤ ខែកុម្ភៈ។

ហើយបន្ទាប់មក ការិយាល័យរបស់ប្រព័ន្ធផ្សព្វផ្សាយទាំងនោះ នឹងត្រូវផ្តល់ឲ្យដល់បណ្ដាញសារព័ត៌មានផ្សេង ដែលមានដូចជា New York Post, One America News Network, Breitbart News Network និង HuffPost News។

អនុស្សរណៈ បានឲ្យដឹងបន្ថែមថា ជារៀងរាល់ឆ្នាំចាប់ពីពេលនេះទៅ បណ្ដាញសារព័ត៌មានមកពីស្ថាប័នផ្សេងៗ ដែលមានដូចជាសារព័ត៌មានបោះពុម្ភ អនឡាញ ទូរទស្សន៍ និងវិទ្យុ នឹងត្រូវផ្លាស់ប្ដូរចេញពីមន្ទីរបញ្ចកោណ «ដើម្បីអនុញ្ញាតឲ្យមានស្ថាប័នថ្មីប្រភេទដូចគ្នាដែលមិនមានឱកាសពិសេសរាយការណ៍ ក្នុងនាមជាសមាជិកនៃអង្គភាពសារព័ត៌មានរបស់មន្ទីរបញ្ចកោណ (Pentagon Press Corps)៕