ក្រុមសង្គ្រោះ និងស៊ើបអង្កេត បានបន្តការងាររបស់ពួកគេនៅលើទន្លេ Potomac នៃទីក្រុង Washington DC កាលពីព្រឹកថ្ងៃសៅរ៍១ កុម្ភៈ ៤ថ្ងៃបន្ទាប់ពីការបុកគ្នាលើអាកាសរវាងយន្តហោះដឹកអ្នកដំណើរ និងឧទ្ធម្ភាគចក្រយោធា ដែលបានសម្លាប់មនុស្សទាំងអស់៦៧ នាក់។

នាវាឆ្មាំល្បាតឆ្នេរអាមេរិក និងនាវានគរបាល នៅតែបន្តទាញយកបំណែកយន្តហោះដឹកអ្នកដំណើររបស់ក្រុមហ៊ុនអាកាសចរណ៍អាមេរិក និងឧទ្ធម្ភាគចក្រ Black Hawk របស់កងទ័ពសហរដ្ឋអាមេរិក ដែលនៅសេសសល់ក្នុងទន្លេ។

សមាជិកក្រុមប្រឹក្សាសុវត្ថិភាពដឹកជញ្ជូនជាតិលោក Todd Inman បាននិយាយថា ការទាញកម្ទេចកម្ទីពីទន្លេ Potomac បានចាប់ផ្តើមនៅថ្ងៃអាទិត្យទី២កុម្ភៈ ក្នុងកិច្ចខិតខំប្រឹងប្រែងមួយដែលទំនងជានឹងមានរយៈពេលពេញមួយសប្តាហ៍។

ប្រធានផ្នែកពន្លត់អគ្គិភ័យ របស់ទីក្រុងវ៉ាស៊ីនតោនឌីស៊ី លោក John Donnelly បានប្រាប់អ្នកសារព័ត៌មានថា សាកសពចំនួន ២៨នាក់ ត្រូវបានកំណត់អត្តសញ្ញាណ ហើយថាលោករំពឹងថា ជនរងគ្រោះទាំងអស់នឹងអាចត្រូវបានរកឃើញ៕