បេឡារុស្ស៖ មេដឹកនាំប្រទេសបេឡារុសបានគំរាមកាត់ផ្តាច់ការផ្គត់ផ្គង់ឧស្ម័នទៅកាន់សហភាពអឺរ៉ុប ប្រសិនបើទណ្ឌកម្មត្រូវបានដាក់លើខ្លួនជុំវិញវិបត្តិជនអន្តោប្រវេសន៍ ដែលកំពុងកើនឡើងនៅព្រំដែនភាគខាងលិចរបស់ប្រទេស។ ប្រធានាធិបតីបេឡារុសកំពុងឆ្លើយតបទៅនឹងការប្រកាសរបស់លោកស្រី Ursula von der Leyen ប្រធានគណៈកម្មការអឺរ៉ុបកាលពីថ្ងៃពុធថា ប្លុកនេះនឹងពង្រីកការដាក់ទណ្ឌកម្មរបស់ខ្លួនលើរបបរបស់លោក Lukashenko ដោយចោទប្រកាន់ទីក្រុង Minsk ពីបទប្រើប្រាស់ "អំណាចភូមិសាស្ត្រនយោបាយដ៏ឃោរឃៅក្នុងការបើកផ្លូវ ឲ្យក្រុមជនអន្តោប្រវេសន៍ទៅកាន់ព្រំដែនសហភាពអឺរ៉ុប ជាការប៉ុនប៉ងបង្កឲ្យមានបង្កវិបត្តិប៉ះពាល់ដល់សន្តិសុខរបស់ខ្លួន ជាការចោទប្រកាន់ដែលខ្លួនបដិសេធ។
មនុស្សរាប់ពាន់នាក់ដែលភាគច្រើនមកពីអ៊ីរ៉ាក់ ស៊ីរី និងយេមែនស្ថិតនៅព្រំដែនជាប់ជាមួយប៉ូឡូញ ដោយស៊ូទ្រាំនឹងលក្ខខណ្ឌត្រជាក់ខ្លាំង ក្នុងក្តីសង្ឃឹមថាមានឱកាសឆ្លងចូលទៅក្នុងសហភាពអឺរ៉ុប។ ជាការសងសឹក សហភាពអឺរ៉ុបត្រូវបានគេរាយការណ៍ថា កំពុងរៀបចំផែនការដាក់ទណ្ឌកម្មថ្មីៗបន្ថែមទៀតលើប្រទេសបេឡារុស។ ប៉ុន្តែកាលពីថ្ងៃព្រហស្បតិ៍ មេដឹកនាំរបស់ប្រទេសនេះគឺលោក Alexander Lukashenko បានព្រមានថា ប្រសិនបើពួកគេដាក់ទណ្ឌកម្មបន្ថែមលើយើង... យើងត្រូវតែឆ្លើយតបវិញ»។ លោកបាននិយាយដោយសំដៅទៅលើបំពង់បង្ហូរឧស្ម័នរបស់រុស្ស៊ី ដែលរត់កាត់ប្រទេសបេឡារុសចូលទៅក្នុងសហភាពអឺរ៉ុបថា «យើងកំពុងដាក់សម្ពាធលើអឺរ៉ុប ហើយពួកគេកំពុងគំរាមកំហែងយើង»។ ការអត្ថាធិប្បាយរបស់លោកបានបង្កើនការព្រួយបារម្ភថ្មី ស្របពេលមានការខ្វះខាតឧស្ម័នធម្មជាតិកាន់តែខ្លាំង និងការកើនឡើងតម្លៃឧស្ម័ននៅសហភាពអឺរ៉ុប៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
