មន្រ្តីជាន់ខ្ពស់ទទួលបន្ទុកផ្នែកអ៊ុយក្រែន របស់លោកប្រធានាធិបតីអាមេរិក Donald Trump បានប្រាប់សារព័ត៌មានរ៉យទ័រថា សហរដ្ឋអាមេរិក ចង់ឱ្យអ៊ុយក្រែន រៀបចំការបោះឆ្នោត ប្រសិនបើអាចទៅរួចគឺនៅចុងឆ្នាំនេះ ជាពិសេសក្នុងករណីដែលទីក្រុងគីវ អាចយល់ព្រមលើបទឈប់បាញ់ជាមួយរុស្ស៊ី ក្នុងប៉ុន្មានខែខាងមុខនេះ។

លោក Keith Kellogg បេសកជនពិសេសរបស់លោក Trump ប្រចាំអ៊ុយក្រែន និងរុស្ស៊ី បាននិយាយនៅក្នុងបទសម្ភាសន៍មួយថា ការបោះឆ្នោតប្រធានាធិបតី និងសភាអ៊ុយក្រែន ដែលបានផ្អាកក្នុងអំឡុងពេលសង្រ្គាមជាមួយរុស្ស៊ី "ចាំបាច់ត្រូវធ្វើឡើង"។

ទាំងលោក Trump និងលោក Kellogg បាននិយាយថា ពួកគេកំពុងធ្វើការលើផែនការដើម្បីសម្របសម្រួលកិច្ចព្រមព្រៀងមួយក្នុងរយៈពេលប៉ុន្មានខែដំបូងនៃរដ្ឋបាលថ្មី ដើម្បីបញ្ចប់សង្រ្គាមដែលផ្ទុះឡើងជាមួយនឹងប្រតិបត្តិការយោធាពិសេសទ្រង់ទ្រាយធំរបស់រុស្ស៊ី នៅក្នុងខែកុម្ភៈ ឆ្នាំ២០២២។

ប្រភពពីរដែលដឹងអំពីការសន្ទនាទាំងនោះ និងអតីតមន្ត្រីអាមេរិកម្នាក់បាននិយាយពីសំណើបោះឆ្នោតនេះថា ផែនការរបស់លោក Trump នៅតែស្ថិតក្នុងដំណាក់កាលបង្កើតឡើង ហើយមិនទាន់មានការសម្រេចចិត្តខាងគោលនយោបាយណាមួយទេ ប៉ុន្តែលោក Kellogg និងក្រុមមន្ត្រីសេតវិមានផ្សេងទៀត បានពិភាក្សាក្នុងប៉ុន្មានថ្ងៃថ្មីៗនេះ ដោយជំរុញឱ្យអ៊ុយក្រែនយល់ព្រមចំពោះការបោះឆ្នោត ដែលជាផ្នែកនៃបទឈប់បាញ់ដំបូងជាមួយរុស្ស៊ី។

គួរបញ្ជាក់ថា បច្ចុប្បន្ន ការបោះឆ្នោតត្រូវបានហាមឃាត់ក្រោមច្បាប់អាជ្ញាសឹក ដែលអ៊ុយក្រែន បានដាក់បន្ទាប់ពីប្រតិបត្តិការយោធារបស់រុស្ស៊ី ឆ្នាំ២០២២៕