ប្រជាជនភៀសខ្លួនរាប់ពាន់នាក់នៅភាគខាងកើតប្រទេសកុងហ្គោ ភ័យខ្លាចការវាយប្រហារបន្ថែមទៀត និងអំពើហិង្សាផ្លូវភេទ ប្រសិនបើពួកគេត្រឡប់ទៅផ្ទះសម្បែងវិញ បន្ទាប់ពីការប្រយុទ្ធគ្នានាពេលថ្មីៗនេះ ទោះបីជាមានការលើកទឹកចិត្តពីក្រុមឧទ្ទាមដែលដណ្ដើមកាន់កាប់ទីក្រុង ឱ្យត្រឡប់ទៅវិញក៏ដោយ។

ក្រុមឧទ្ទាម M23 ដែលគាំទ្រដោយប្រទេសរ្វ៉ាន់ដា បានដណ្តើមកាន់កាប់ទីក្រុង Goma រដ្ឋធានីរបស់ខេត្ត North Kivu កាលពីសប្តាហ៍មុន ហើយចាប់តាំងពីពេលនោះមក បានសម្រុកឆ្ពោះទៅកាន់ទីក្រុង Bukavu ភាគខាងត្បូងខេត្ត Kivu ដោយធ្វើឱ្យវិបត្តិមនុស្សធម៌ដ៏យូរអង្វែងកាន់តែអាក្រក់ទៅៗ។

អ្នកក្រុង Goma បានប្រមូលផ្ដុំគ្នាស្នាក់នៅសាលាបឋមសិក្សាមួយកន្លែងឆ្ងាយពីក្រុងកាលពីថ្ងៃអាទិត្យ (០២ កុម្ភៈ) ដោយជនភៀសខ្លួនទាំងនោះបានរៀបរាប់ពីហេតុការណ៍រន្ធត់ និងភ័យខ្លាចក្នុងការរត់ភៀសខ្លួនពីការវាយប្រហារជាច្រើនដង និងរស់នៅក្នុងស្ថានភាពដ៏លំបាក ខណៈរាយការណ៍ពីអំពើហិង្សាផ្លូវភេទយ៉ាងទូលំទូលាយដោយក្រុមប្រដាប់អាវុធប្រឆាំងនឹងស្ត្រី និងកុមារី។

ក្រុមឧទ្ទាមចង់បង្ហាញថា ពួកគេអាចស្តារសណ្តាប់ធ្នាប់ និងបានជំរុញឱ្យជនស៊ីវិលត្រឡប់ទៅរកជីវិតធម្មតាវិញ ប៉ុន្តែអ្នកស្រុកជាច្រើន ជាពិសេសស្រ្តី បានសម្ដែងក្ដីបារម្ភ ហើយគិតថានឹងមិនមានសុវត្ថិភាពក្នុងការត្រលប់ទៅតំបន់នានានៅជិតក្រុង Goma វិញនោះទេ៕