ក្រុមឧទ្ទាមមកពីចលនា M23 ដែលកំពុងប្រតិបត្តិការនៅភាគខាងកើតនៃសាធារណរដ្ឋប្រជាធិបតេយ្យកុងហ្គោ ទាមទារឲ្យរដ្ឋាភិបាលកុងហ្គោចូលរួម ក្នុងការសន្ទនាដោយផ្ទាល់ជាមួយពួកគេ។ នេះបើយោងតាមអ្នកនាំពាក្យក្រុមឧទ្ទាម Lawrence Kanyuka។

សារព័ត៌មាន New Times របស់ប្រទេសរ្វ៉ាន់ដា បានដកស្រង់សម្តីលោកដែលនិយាយថា៖«យើងរំលឹកឡើងវិញនូវការអំពាវនាវរបស់យើងឲ្យមានការសន្ទនាដោយស្មោះត្រង់ និងដោយផ្ទាល់ ជាមួយរបប ទីក្រុងKinshasa ដើម្បីដោះស្រាយបញ្ហាឫសគល់នៃជម្លោះ និងបង្កើតសន្តិភាពយូរអង្វែង នៅក្នុងប្រទេសរបស់យើង»។

យោងតាមលោក Kamyuka បានឲ្យដឹងថា ក្រុមឧទ្ទាមបានប្តេជ្ញាចិត្តក្នុងការដោះស្រាយជម្លោះដោយសន្តិវិធី។

ទន្ទឹមនឹងនេះ រដ្ឋាភិបាលនៃសាធារណរដ្ឋប្រជាធិបតេយ្យកុងហ្គោ ច្រានចោលការចរចាដោយផ្ទាល់ជាមួយ M23 ដោយនិយាយថា នេះគឺជាក្រុមភេរវករ។ ចំណែកប្រទេសរ្វ៉ាន់ដា បដិសេធមិនបន្តធ្វើការលើកិច្ចព្រមព្រៀងស្តីពីការដោះស្រាយទំនាក់ទំនងជាមួយកុងហ្គោ ប្រសិនបើអាជ្ញាធររបស់ខ្លួន មិនចូលរួមក្នុងកិច្ចសន្ទនា ជាមួយក្រុមឧទ្ទាមM23 នោះទេ។

កាលពីសប្តាហ៍មុន អង្គភាពជាច្រើនរបស់ ក្រុមឧទ្ទាម M23 ដែលគាំទ្រដោយកងទ័ពរ្វ៉ាន់ដា បានដណ្តើមយកទីក្រុង Goma ដែលជារដ្ឋធានីនៃខេត្ត North Kivu របស់ប្រទេសកុងហ្គោ។ ឥឡូវនេះ ពួកគេកំពុងរុលចូលទៅកាន់ទីក្រុង Bukavu ជារដ្ឋធានីនៃខេត្ត South Kivu ដែលនៅជិតខាង។ បច្ចុប្បន្ននេះ ក្រុមឧទ្ទាម គឺស្ថិតនៅចម្ងាយប្រហែល ៦០គីឡូម៉ែត្រ ពីទីក្រុង Bukavu ដែលមានប្រជាជនជាងមួយលាននាក់។