ដោយសារការគាំទ្រយ៉ាងខ្លាំងក្លារបស់លោកប្រធានាធិបតី លោក Donald Trump ចំពោះការដំឡើងពន្ធគយ ការភ័យខ្លាចពីបញ្ហាភូមិសាស្ត្រនយោបាយទាំងអស់ សម្រាប់នាយកប្រតិបត្តិសាជីវកម្មរបស់ពិភពលោក ក្នុងឆ្នាំ២០២៥ គឺជាសង្រ្គាមពាណិជ្ជកម្មសកល ដែលពួកគេជឿជាក់ថា នឹងជិតកើតមានហើយ។

ការរកឃើញនេះ បានមកដោយសារការស្ទង់មតិ ចំពោះនាយកប្រតិបត្តិជាន់ខ្ពស់ ១.៧០០នាក់ ដោយស្ថាប័ន Conference Board (ប្រឹក្សាសន្និសីទ) ដែលបានចេញផ្សាយនៅប៉ុន្មានថ្ងៃមុនការស្បថចូលកាន់តំណែងលើកទី២ របស់លោក Trump។

៤៥ភាគរយនៃអ្នកគ្រប់គ្រងអាជីវកម្មមួយចំនួន បានដាក់ឈ្មោះការមានសង្គ្រាមនេះថា ជាការភ័យខ្លាចដ៏ធំបំផុតរបស់ពួកគេ សម្រាប់រយៈពេល ១២ខែខាងមុខនេះ ដោយចំនួននេះច្រើនជាងទ្វេដងនៃកម្រិត ១៩ភាគរយ ដែលបានបង្ហាញក្ដីកង្វល់ដូចគ្នាកាលពីឆ្នាំមុន។ នាយកប្រតិបត្តិអាមេរិក មានការព្រួយបារម្ភជាពិសេស ដោយ ៤៧ភាគរយ បានចាត់ទុកថា ជាកង្វល់ធំបំផុតរបស់ពួកគេ។

តែទោះជាយ៉ាងនេះក៏ដោយ ក៏នាយកប្រតិបត្តិធំៗទាំងនោះ មិនរំពឹងថា ឆ្នាំ២០២៥ គឺជាមហន្តរាយនោះដែរ ដោយមានចំនួនតិចតួច បារម្ភអំពីការមានវិបត្តិសេដ្ឋកិច្ច ខណៈជាច្រើននាក់មានអារម្មណ៍ជឿជាក់ និងសុទិដ្ឋិនិយម អំពីកំណើនសេដ្ឋកិច្ច។

គួរបញ្ជាក់ថា លោក Trump កាលពីថ្ងៃសុក្រចុងសប្ដាហ៍កន្លងមក បានប្រកាសការដំឡើងពន្ធ ២៥ភាគរយលើប្រទេសម៉ិកស៊ិក និងកាណាដា ព្រមទាំងពន្ធ ១០ភាគរយលើទំនិញនាំចូលពីប្រទេសចិន។ ប្រទេសទាំង៣ បានប្តេជ្ញាចេញវិធានការសងសឹក នៅពេលដែលការដំឡើងពន្ធនេះចូលជាធរមាន នៅថ្ងៃទី៤ ខែកុម្ភៈ៕