ចលនាតស៊ូឥស្លាម (ហាម៉ាស) កាលពីថ្ងៃអាទិត្យ បានចោទប្រកាន់អ៊ីស្រាអែលថា បានពន្យារពេលដំណើរការផ្តល់ជំនួយសង្គ្រោះ និងការកសាងឡើងវិញ នៅតំបន់ហ្កាហ្សា បើទោះបីជាអនុវត្តកិច្ចព្រមព្រៀងបទឈប់បាញ់ក៏ដោយ។

អ្នកនាំពាក្យក្រុមហាម៉ាស លោក Hazem Qassem បាននិយាយនៅក្នុងសេចក្តីប្រកាសព័ត៌មានមួយថា  ៖«ការគ្រប់គ្រងនេះ នៅតែពន្យារពេលក្នុងការអនុវត្តដំណើរការផ្តល់ជំនួយសង្គ្រោះ និងការកសាងឡើងវិញ ដែលមានចែងក្នុងកិច្ចព្រមព្រៀងបទឈប់បាញ់ ដោយមិនបានប្តេជ្ញាចិត្តពេញលេញចំពោះតំបន់មនុស្សធម៌មួយចំនួន»។

លោក Qassem បានលើកឡើងថា៖«ទោះបីជាមានការបំផ្លិចបំផ្លាញដ៏ធំ នៅក្នុងវិស័យថែទាំសុខភាពក៏ដោយ ប៉ុន្តែការកាន់កាប់នេះ មិនអនុញ្ញាតឲ្យមានការងារស្តារឡើងវិញ ឬការផ្គត់ផ្គង់ផ្នែកវេជ្ជសាស្រ្តចាំបាច់នោះទេ» ដោយបន្ថែមថា ប្រេងឥន្ធនៈដែលចូលទៅក្នុងតំបន់ហ្កាហ្សា «នៅមានកម្រិតទាបជាងអ្វីដែលកិច្ចព្រមព្រៀង បានបញ្ជាក់»។

លោកបានអំពាវនាវដល់អ្នកសម្រុះសម្រួល និងអ្នកធានានៃកិច្ចព្រមព្រៀងបទឈប់បាញ់ បង្ខំអ៊ីស្រាអែលឲ្យអនុញ្ញាតឲ្យចូលជាបន្ទាន់នូវសម្ភារៈសង្គ្រោះ ដូចដែលមានចែងក្នុងកិច្ចព្រមព្រៀង ជាពិសេសតង់ ប្រេងឥន្ធនៈ ការផ្គត់ផ្គង់ស្បៀងអាហារ និងគ្រឿងចក្រធុនធ្ងន់ ហើយបញ្ឈប់រាល់ការរំលោភបំពាន និងការប្រព្រឹត្តបទល្មើសផ្សេងៗ។

ចាប់តាំងពីថ្ងៃទី ០៧ ខែតុលា ឆ្នាំ ២០២៣ មក ក្រុមហាម៉ាស និងអ៊ីស្រាអែល បានជាប់ពាក់ព័ន្ធ ក្នុងជម្លោះដ៏សាហាវ ដែលបានផ្តាច់ជីវិតមនុស្សរាប់ម៉ឺននាក់ មុនពេលពួកគេយល់ព្រមលើកិច្ចព្រមព្រៀងឈប់បាញ់ ដែលសម្របសម្រួលដោយកាតា អេហ្ស៊ីប និងសហរដ្ឋអាមេរិក នៅថ្ងៃទី ១៩ ខែមករា។