វិមានក្រឹមឡាំង បាននិយាយកាលពីថ្ងៃចន្ទ (០៣ កុម្ភៈ) ថា ពេលនេះគឺលឿនពេកក្នុងការពិភាក្សាពីលទ្ធភាពនៃទម្រង់កិច្ចចរចាសន្តិភាពបួនផ្លូវ ដែលស្នើដោយប្រធានាធិបតីអ៊ុយក្រែន លោក Volodymyr Zelenskiy ហើយបានរំលឹកឡើងវិញនូវកង្វល់ពីអាណត្តិបោះឆ្នោតរបស់មេដឹកនាំអ៊ុយក្រែនរូបនេះ។

លោក Zelenskiy បានប្រាប់សារព័ត៌មាន AP ក្នុងបទសម្ភាសន៍មួយដែលចេញផ្សាយកាលពីថ្ងៃសៅរ៍សប្ដាហ៍មុនថា លោកចង់បានកិច្ចចរចាបួនផ្លូវរវាងសហរដ្ឋអាមេរិក អ៊ុយក្រែន រុស្ស៊ី និងសហភាពអឺរ៉ុប ហើយព្រមានថា នឹងមានគ្រោះថ្នាក់ខ្លាំងណាស់ដែលក្រុងវ៉ាស៊ីនតោន និងទីក្រុងមូស្គូពិភាក្សាគ្នាពីការបញ្ចប់សង្គ្រាមដោយមិនមានការចូលរួមពីទីក្រុងគីវ។

នៅពេលត្រូវសាកសួរពីគំនិតរបស់លោក Zelenskiy លើទម្រង់នៃកិច្ចចរចានាពេលអនាគតនោះ អ្នកនាំពាក្យវិមានក្រឹមឡាំង លោក Dmitry Peskov បានប្រាប់អ្នកសារព័ត៌មានថា "រហូតមកដល់ពេលនេះ ពុំទាន់បានពិភាក្សាម៉ឺងម៉ាត់ណាមួយពីលទ្ធភាពនៃការរួមបញ្ចូលលើអ្នកចូលរួមក្នុងកិច្ចចរចានេះទេ" ដោយសង្កត់ធ្ងន់ពីការសន្មត់របស់ខ្លួនថា ប្រធានាធិបតីអ៊ុយក្រែនមិនមានសិទ្ធិធ្វើកិច្ចចរចាបែបនេះឡើយ។

ទីក្រុងមូស្គូបាននិយាយជាយូរមកហើយថា ការពិតដែលថាលោក Zelenskiy មិនត្រូវបានជាប់ឆ្នោតឡើងវិញកាលពីឆ្នាំមុននៅពេលអាណត្តិ ៥ឆ្នាំរបស់លោកបានផុតកំណត់ - ដោយសារតែច្បាប់អាជ្ញាសឹកកំពុងនៅជាធរមាន - មានន័យថាលោកនឹងមិនមានសិទ្ធិអំណាចផ្លូវច្បាប់ដើម្បីចុះហត្ថលេខាលើកិច្ចព្រមព្រៀងសន្តិភាពទេ។ ទីក្រុងគីវបដិសេធជំហរនោះថាជាការសន្មត់ដែលបង្កើតឡើងដើម្បីធ្វើឱ្យស្មុគស្មាញដល់កិច្ចចរចាសន្តិភាព៕