ប្រភពពីការិយាល័យនយោបាយក្រុមហាម៉ាស បាននិយាយកាលពីថ្ងៃចន្ទ (០៣ កុម្ភៈ) ថា ក្រុមនេះបានត្រៀមខ្លួនរួចជាស្រេចក្នុងការចរចាដោយប្រយោលជាមួយអ៊ីស្រាអែល ដើម្បីអនុវត្តដំណាក់កាលទីពីរនៃបទឈប់បាញ់នៅតំបន់ហ្កាហ្សា និងលទ្ធភាពនៃការផ្លាស់ប្តូរអ្នកទោស និងចំណាប់ថ្នូរ។

ប្រភពដែលសុំមិនបញ្ចេញឈ្មោះបាននិយាយថា ក្រុមហាម៉ាស បានបំពេញលក្ខខណ្ឌទាំងអស់នៃកិច្ចព្រមព្រៀង ហើយត្រៀមខ្លួនជាស្រេចដើម្បីចាប់ផ្តើមការចរចាដោយប្រយោលជាមួយភាគីអ៊ីស្រាអែល ដើម្បីបញ្ចប់ដំណាក់កាលទីពីរ។

នៅក្រោមកិច្ចព្រមព្រៀងឈប់បាញ់ ៣ដំណាក់កាលដែលសម្រេចបានរវាងអ៊ីស្រាអែល និងក្រុមហាម៉ាស កាលពីខែមុនបានចែងថា កិច្ចចរចាលើការអនុវត្តដំណាក់កាលទីពីរគឺត្រូវចាប់ផ្តើមមុនថ្ងៃទី១៦ នៃដំណាក់កាលទីមួយ ពោលគឺនៅថ្ងៃចន្ទ ០៣ កុម្ភៈ។

យ៉ាងណាមិញ នាយករដ្ឋមន្ត្រីអ៊ីស្រាអែល លោក Benjamin Netanyahu បានធ្វើដំណើរទៅកាន់ទីក្រុងវ៉ាស៊ីនតោន កាលពីថ្ងៃអាទិត្យ ០២ កុម្ភៈ ដើម្បីជួបជាមួយប្រធានាធិបតីអាមេរិក លោក Donald Trump។ របាយការណ៍ប្រព័ន្ធផ្សព្វផ្សាយលើកឡើងថា លោក Netanyahu បានសម្រេចចិត្តពន្យារពេលការបញ្ជូនក្រុមចរចាទៅកាន់ប្រទេសកាតាដើម្បីពិភាក្សាលើដំណាក់កាលទីពីរ រហូតដល់បន្ទាប់ពីកិច្ចប្រជុំរបស់លោកជាមួយលោក Trump បានបញ្ចប់៕