មន្ត្រីសេតវិមាន បាននិយាយកាលពីថ្ងៃចន្ទថា ប្រធានាធិបតីសហរដ្ឋអាមេរិក លោក Donald Trump ត្រូវបានគេរំពឹងថានៅថ្ងៃអង្គារ ទី៤ ខែធ្នូនេះ នឹងបញ្ឈប់ការជាប់ពាក់ព័ន្ធរបស់សហរដ្ឋអាមេរិកជាមួយក្រុមប្រឹក្សាសិទ្ធិមនុស្សរបស់អង្គការសហប្រជាជាតិ និងបន្តបញ្ឈប់ការផ្តល់មូលនិធិសម្រាប់ទីភ្នាក់ងារសង្គ្រោះប៉ាឡេស្ទីន(UNRWA)។

ចំណាត់ការនេះកើតឡើងស្របពេលជាមួយនឹងដំណើរទស្សនកិច្ចទៅកាន់ទីក្រុងវ៉ាស៊ីនតោន របស់នាយករដ្ឋមន្រ្តីអ៊ីស្រាអែល លោក Benjamin Netanyahu ដែលបានរិះគន់ទីភ្នាក់ងារ UNRWA ជាយូរមកហើយ ដោយចោទប្រកាន់ទីភ្នាក់ងារនេះពីការញុះញង់ប្រឆាំងអ៊ីស្រាអែល ហើយបុគ្គលិករបស់ទីភ្នាក់ងារមាន «ជាប់ពាក់ព័ន្ធក្នុងសកម្មភាពភេរវកម្មប្រឆាំងអ៊ីស្រាអែល»។

ក្នុងអំឡុងពេលអាណត្តិដំបូងរបស់ លោក Trump ក្នុងការកាន់តំណែងពីឆ្នាំ២០១៧ ដល់ឆ្នាំ២០២១ លោកក៏បានកាត់ផ្តាច់ការផ្តល់មូលនិធិសម្រាប់ទីភ្នាក់ងារ UNRWA ដោយនិយាយថា ប៉ាឡេស្ទីន ចាំបាច់ត្រូវព្រមព្រៀងបន្តការចរចាសន្តិភាពជាមួយអ៊ីស្រាអែល និងអំពាវនាវឱ្យមានកំណែទម្រង់ដែលពុំបានបញ្ជាក់ច្បាស់។

ក្រុមការងាររបស់ក្រុមប្រឹក្សាសិទ្ធិមនុស្ស មានផែនការពិនិត្យឡើងវិញកំណត់ត្រាសិទ្ធិមនុស្សរបស់សហរដ្ឋអាមេរិកនៅក្នុងខែសីហា ជាដំណើរការដែលប្រទេសទាំងអស់ត្រូវឆ្លងកាត់រៀងរាល់ពីរទៅបីឆ្នាំម្តង។

ចាប់តាំងពីចូលកាន់តំណែងក្នុងអាណត្តិលើកទីពីរនៅថ្ងៃទី ២០ ខែមករា លោក Trump បានបញ្ជាឱ្យសហរដ្ឋអាមេរិក ដកខ្លួនចេញពីអង្គការសុខភាពពិភពលោក និងចេញពីកិច្ចព្រមព្រៀងអាកាសធាតុទីក្រុងប៉ារីស ជាចំណាត់ការដែលលោកបានអនុវត្តក្នុងអំឡុងពេលអាណត្តិដំបូងរបស់លោក។