អាជ្ញាធរខេត្ដសៀមរាប បើកទឹកស្ទឹងសៀមរាប ដើម្បីជួយ​ស្រោចស្រព ស្រូវប្រាំងរបស់ប្រជាកសិករ​ជាងមួយពាន់ហិកតា ទៅតាមការស្នើរសុំរបស់ពួកគាត់យកទៅស្រោចស្រព​ស្រូវដែលប្រឈម​នឹងកង្វះខាតទឹក នៅសង្កាត់ចំនួនពីររួមមានសង្កាត់ចុងឃ្នៀស និងសង្កាត់សៀមរាប ខេត្ដសៀមរាប ។

ការបើកទឹកស្ទឹងសៀមរាប បញ្ចូលទៅតាមស្រែប្រាំងប្រជាកសិករនេះ បានធ្វើឡើងចាប់ពី​រសៀលថ្ងៃទី៣ខែកុម្ភៈឆ្នាំ២០២៥ ដែលមកដល់ថ្ងៃនេះ ប្រភពទឹកដែលហូរចេញពីស្ទឹងសៀមរាប បានបូមបញ្ចូលស្រែខ្លះហើយ បន្ទាប់ឯកឧត្តម ប្រាក់ សោភ័ណ អភិបាលខេត្ដសៀមរាប បានជំរុញអាជ្ញាធរជំនាញសម្របសម្រួលជាមួយក្រុមហ៊ុន ស្ថាបនាដងស្ទឹងសៀមរាប បើកទឹកជួយសង្គ្រោះស្រូវប្រាំងនៅសង្កាត់សៀមរាប ​និងចុងឃ្នៀសនោះ។

ប្រជាកសិករ បានលើកឡើងថា ស្រូវស្រែប្រាំងរបស់ពួកគាត់នាឆ្នាំនេះ ប្រឈមនឹងស្វិតស្រពោន ហើយអាចឈានដល់ការបាត់បង់​ទិន្នផល បើសិនជាគ្មានទឹកគ្រប់គ្រាន់ ​ប៉ុន្ដែមកដល់ថ្ងៃនេះ អាជ្ញាធរខេត្ដក្រុង ក៏ដូចស្ថាប័នពាក់ព័ន្ធ បានបើកទឹកស្ទឹងសៀមរាប បូមដាក់ស្រែទៅតាមតម្រូវ​ការជាបណ្ដើរៗហើយ។ពួកគាត់ លើកឡើងថា ការកង្វះទឹកធ្វើស្រែឆ្នាំនេះ ដោយសារស្ថានភាព​ទឹកទន្លេតិច ​ហើយទឹកស្ទឹងសៀមរាប ដែលជាប្រភពទឹកហូរធ្លាក់ចូលស្រែជារៀងរាល់ឆ្នាំ​ក៏​មានការខ្វះខាត ខណៈដែលស្ទឹងសៀមរាបនោះកំពុងកែលម្អ។

ពួកគាត់បានថ្លែងអំណរគុណដល់រាជរដ្ឋាភិបាល អាជ្ញាធរខេត្ដ និងស្ថាប័នពាក់ព័ន្ធដែលផ្ដល់ទឹកជួយសង្គ្រោះស្រូវរបស់គាត់ ដែលនេះបង្ហាញពីការយកចិត្ដទុកដល់ប្រជាកសិករ ។

សូមបញ្ជាក់ថា ទំហំដីស្រែប្រាំងក្នុងសង្កាត់សៀមរាបដែលប្រើប្រាស់ទឹកស្ទឹង (ប៉ែកខាងកើតភ្នំក្រោម) មានចំនួន១០១០ហិកតា ។ ដោយឡែកដីស្រែប្រាំង​នៅ​សង្កាត់ចុងឃ្នៀស (ជាអតីតដីស្រែប្រាំងសង្កាត់សៀមរាប) ហើយប្រើប្រាស់ទឹកស្ទឹងផងដែរមានចំនួន ៣៤៤ហិកតា ដែលសរុបមានចំនួន ១៣៥៤ហិកតា៕