ទីក្រុងប៉េកាំង បានប្រកាសដំឡើងពន្ធនៅថ្ងៃអង្គារ (០៤ កុម្ភៈ) នេះលើការនាំចូលរបស់អាមេរិកមួយចំនួន រួមមានប្រេងឆៅ គ្រឿងយន្តកសិកម្ម និងឧស្ម័នធម្មជាតិរាវ ជាការសងសឹកចំពោះការដាក់ពន្ធ ១០% របស់រដ្ឋបាលលោក Donald Trump លើការនាំចូលរបស់ចិន ទៅកាន់សហរដ្ឋអាមេរិក។

វិធានការដែលបានប្រកាសដោយក្រសួងហិរញ្ញវត្ថុចិននោះ បានយកពន្ធ ១៥% បន្ថែមលើប្រភេទខ្លះនៃធ្យូងថ្ម និងឧស្ម័នធម្មជាតិរាវ និងពន្ធ ១០% លើប្រេងឆៅ គ្រឿងចក្រកសិកម្ម រថយន្តដឹកជញ្ជូនខ្នាតធំ និងរថយន្តភីកអាប់។ វិធានការនេះចូលជាធរមាននៅថ្ងៃទី១០ ខែកុម្ភៈ។

ក្នុងអំឡុងពេលអាណត្តិដំបូងរបស់ខ្លួនក្នុងឆ្នាំ២០២៨ លោក Trump បានចាប់ផ្តើមសង្រ្គាមពាណិជ្ជកម្មរយៈពេល ២ឆ្នាំដ៏ឃោរឃៅជាមួយចិន ជុំវិញអតិរេកពាណិជ្ជកម្មដ៏ធំរបស់សហរដ្ឋអាមេរិក ជាមួយនឹងពន្ធសងសឹកលើទំនិញដែលមានតម្លៃរាប់រយពាន់លានដុល្លារ ដែលប៉ះពាល់ខ្សែច្រវ៉ាក់ផ្គត់ផ្គង់ពិភពលោក និងធ្វើឱ្យខូចសេដ្ឋកិច្ចពិភពលោក។

ដើម្បីបញ្ចប់សង្រ្គាមពាណិជ្ជកម្មនោះ ចិនបានយល់ព្រមនៅឆ្នាំ២០២០ ក្នុងការចំណាយបន្ថែម ២០០ពាន់លានដុល្លារក្នុងមួយឆ្នាំលើទំនិញអាមេរិក ប៉ុន្តែផែនការនេះត្រូវបានបំផ្លាញដោយសារជំងឺរាតត្បាតកូវីដ១៩ ហើយឱនភាពពាណិជ្ជកម្មប្រចាំឆ្នាំរបស់ខ្លួនបានកើនឡើងដល់ ៣៦១ពាន់លានដុល្លារ នេះបើតាមទិន្នន័យគយចិន ចេញផ្សាយកាលពីខែមុន៕