ប្រធានាធិបតីប្រទេសអេក្វាឌ័រ លោក Daniel Noboa បាននិយាយកាលពីថ្ងៃចន្ទថា ប្រទេសលោក នឹងដាក់ពន្ធបន្ថែម២៧ភាគរយលើផលិតផលដែលនាំចូលមកពីប្រទេសម៉ិកស៊ិក ដើម្បីជួយជំរុញផលិតកម្មក្នុងស្រុក។

នៅក្នុងការបង្ហោះនៅលើវេទិកាបណ្តាញសង្គម X លោក Noboa បាននិយាយថា «ប្រទេសអេក្វាឌ័រថ្មី តែងតែបើកចំហចំពោះការធ្វើសមាហរណកម្មពាណិជ្ជកម្ម ប៉ុន្តែពុំមែនបើកចំហនៅពេលដែលមានការរំលោភបំពាននោះទេ»។

លោក Noboa បាននិយាយថា «យើងផ្តល់សច្ចាប័នលើគោលជំហររបស់យើង ក្នុងការចុះហត្ថលេខាលើកិច្ចព្រមព្រៀងពាណិជ្ជកម្មសេរីជាមួយប្រទេសម៉ិកស៊ិក។ ប៉ុន្តែរហូតទាល់តែវាកើតឡើង និងក្លាយជាការពិត ដែលយើងនឹងអនុវត្តពន្ធបន្ថែម២៧% លើផលិតផលដែលយើងនាំចូល ដោយមានគោលដៅជួយជំរុញឧស្សាហកម្មរបស់យើង និងធានាឱ្យមានការប្រព្រឹត្តិដោយយុត្តិធម៌សម្រាប់អ្នកផលិតរបស់យើង។

ទាំងការិយាល័យប្រធានាធិបតី ទាំងក្រសួងការបរទេស មិនបានចេញសេចក្តីលម្អិតណាមួយ អំពីថាតើនៅពេលណាដែលពន្ធនឹងចូលជាធរមាន នោះទេ។ នាយកដ្ឋានទំនាក់ទំនងនៃក្រសួងការបរទេសបាននិយាយថា ក្រសួងផលិតកម្ម ពាណិជ្ជកម្មបរទេស ការវិនិយោគ និងនេសាទ ទទួលខុសត្រូវចំពោះ «ការសម្រេចចិត្តលើការកំណត់ការបន្ថែមពន្ធ»។

ប្រទេសអេក្វាឌ័រ និងម៉ិកស៊ិក បានផ្តាច់ទំនាក់ទំនងផ្នែកការទូតនៅខែមេសា ឆ្នាំ២០២៤ បន្ទាប់ពីនគរបាលអេក្វាឌ័រ បានឆ្មក់ចូលស្ថានទូតម៉ិកស៊ិកក្នុងទីក្រុងគីតូ ដើម្បីចាប់ខ្លួនអតីតអនុប្រធានាធិបតី លោក Jorge Glas ដែលបានស្វែងរកការជ្រកកោននៅទីនោះ។