មជ្ឈមណ្ឌលសារព័ត៌មានរបស់ប្រទេសអេហ្ស៊ីប បាននិយាយនៅក្នុងសេចក្តីថ្លែងការណ៍មួយ កាលពីថ្ងៃចន្ទថា អ្នកជំងឺជនជាតិប៉ាឡេស្ទីនសរុបចំនួន ៩៤នាក់ និងបុគ្គលអមដំណើរ ១២៥នាក់ មកពីតំបន់ហ្កាហ្សាស្ទ្រីប បានចូលទៅប្រទេសអេហ្ស៊ីប តាមច្រក Rafah ចាប់តាំងពីថ្ងៃសៅរ៍។

នៅថ្ងៃចន្ទតែមួយថ្ងៃ អ្នកជំងឺ ២៣នាក់ និងអ្នកមើលថែចំនួន ២៤នាក់ បានមកដល់ប្រទេសអេហ្ស៊ីប។

ក្រុមទី១នៃអ្នកជំងឺហ្កាហ្សាចំនួន ៣៧នាក់ និងបុគ្គលអមដំណើរ ៣៨នាក់ បានចូលប្រទេសអេហ្ស៊ីប កាលពីថ្ងៃសៅរ៍ បន្ទាប់ពីបើកឡើងវិញនូវច្រកឆ្លងកាត់ Rafah ដែលត្រូវបានបិទ ចាប់តាំងពីខែឧសភា ឆ្នាំ ២០២៤ ។

ប្រព័ន្ធផ្សព្វផ្សាយប៉ាឡេស្ទីន បានរាយការណ៍ថា អ្នកជំងឺភាគច្រើន គឺជាកុមារដែលមានជំងឺមហារីក និងជំងឺបេះដូង និងបុគ្គលដែលបានរងរបួស នៅក្នុងជម្លោះដែលកំពុងបន្ត។

នៅថ្ងៃទី ១៩ ខែមករា ច្រកឆ្លងកាត់ Rafah ត្រូវបានបើកឡើងវិញ ពីភាគីអេហ្ស៊ីប ដែលជាផ្នែកមួយនៃកិច្ចព្រមព្រៀងឈប់បាញ់ រវាងក្រុមហាម៉ាស និងអ៊ីស្រាអែល។ ចាប់តាំងពីខែឧសភា ឆ្នាំ ២០២៤ ច្រកឆ្លងកាត់ខាងប៉ាឡេស្ទីន ត្រូវបានគ្រប់គ្រងដោយអ៊ីស្រាអែល ដែលបានរារាំងប្រតិបត្តិការរបស់ខ្លួន រហូតដល់មានកិច្ចព្រមព្រៀងបទឈប់បាញ់ នាពេលថ្មីៗនេះ។