ក្រសួងនេះ បានឲ្យដឹងថា អនុរដ្ឋមន្ត្រីការបរទេសរុស្ស៊ីកាលពីថ្ងៃចន្ទ បានជួបជាមួយមន្ត្រីជាន់ខ្ពស់ហាម៉ាស នៅទីក្រុងមូស្គូ ហើយបានជំរុញឲ្យក្រុមហាម៉ាសរក្សា «ពាក្យសន្យា» ក្នុងការដោះលែងចំណាប់ថ្នូរ រុស្ស៊ីម្នាក់។

លោក Mikhail Bogdanov ដែលជាបេសកជនពិសេសរបស់លោកប្រធានាធិបតី វ្ល៉ាឌីមៀ ពូទីន ប្រចាំតំបន់មជ្ឈិមបូព៌ា បានជួបជាមួយលោក Musa Abu Marzuk សមាជិកជាន់ខ្ពស់នៃការិយាល័យនយោបាយរបស់ក្រុមហាម៉ាស។

ប្រទេសរុស្ស៊ី បានអំពាវនាវឲ្យមានការដោះលែងពលរដ្ឋរុស្ស៊ី-អ៊ីស្រាអែល ពីរនាក់គឺលោក Alexander Trufanov និងលោក Maxim Herkin បុរសជនជាតិអ៊ីស្រាអែល មកពីតំបន់ Donbas នៃអ៊ុយក្រែនជាមួយសាច់ញាតិរុស្ស៊ី។

ក្រសួងបានបញ្ជាក់ថា នៅក្នុងកិច្ចពិភាក្សារបស់ពួកគេ លោក Bogdanov «បានសង្កត់ធ្ងន់ជាថ្មីទៅលើភាពចាំបាច់នៃការអនុវត្តការសន្យា ដែលបានផ្តល់ឲ្យដោយថ្នាក់ដឹកនាំរបស់ក្រុមហាម៉ាស ស្តីពីការដោះលែងពលរដ្ឋរុស្ស៊ីលោក Trufanov និងចំណាប់ថ្នូរដទៃទៀត ពីការឃុំឃាំង។

លោក Trufanov ត្រូវបានគេស្គាល់ថា Sasha ត្រូវបានចាប់ពង្រត់ កាលពីថ្ងៃទី ០៧ ខែតុលា ឆ្នាំ ២០២៣ ជាមួយមិត្តស្រីរបស់ខ្លួន ឈ្មោះ Sapir Cohen ពីតំបន់ Nir Oz kibbutz ក្បែរព្រំដែនហ្កាហ្សា។

ឪពុករបស់លោក ត្រូវបានសម្លាប់ នៅក្នុងការវាយប្រហារ ហើយម្តាយ និងជីដូន ត្រូវបានគេចាប់ពង្រត់ ហើយត្រូវបានដោះលែង នៅក្នុងខែវិច្ឆិកា ឆ្នាំ ២០២៣។ គ្រួសារនេះ បានរត់ពីប្រទេសរុស្ស៊ី ទៅរស់នៅ ប្រទេសអ៊ីស្រាអែល នៅចុងទសវត្សរ៍ឆ្នាំ ១៩៩០។