ក្រសួងការបរទេសអូម៉ង់ នឹងធ្វើជាម្ចាស់ផ្ទះសន្និសីទមហាសមុទ្រឥណ្ឌាលើកទី ១៨ នៅថ្ងៃទី ១៦ ខែកុម្ភៈ ដើម្បីពិភាក្សាអំពីបញ្ហាសន្តិសុខ និងពាណិជ្ជកម្មដែនសមុទ្រ។

ក្រសួងបានលើកឡើងថា សន្និសីទរយៈពេលពីរថ្ងៃ នឹងប្រព្រឹត្តទៅក្រោមប្រធានបទ «ការធ្វើដំណើរឆ្ពោះទៅដំណាក់កាលថ្មីនៃការចាប់ផើ្តមភាពជាដៃគូដែនសមុទ្រ» ដោយបញ្ជាក់ពីការប្តេជ្ញាចិត្តរបស់ទីក្រុង Muscat ក្នុងការពង្រឹងសន្តិសុខដែនសមុទ្រ និងការដឹកជញ្ជូនទំនិញប្រកបដោយនិរន្តរភាព ក៏ដូចជាការអភិវឌ្ឍកិច្ចសហប្រតិបត្តិការអន្តរជាតិ។

រដ្ឋមន្ត្រីការបរទេសអូម៉ង់លោក Sayyid Badr bin Hamad Al-Busaidi បាននិយាយថា សន្និសីទនេះ គឺជាវេទិកាដ៏សំខាន់សម្រាប់ពិភាក្សាអំពីសេដ្ឋកិច្ចនៅសមុទ្រ និងអភិបាលកិច្ចមហាសមុទ្រ។

ព្រឹត្តិការណ៍នេះ ត្រូវបានគេរំពឹងថា នឹងទាក់ទាញប្រជាជនមកពីប្រទេសជាង ៦០ ដើម្បីពិភាក្សាអំពីភាពជាដៃគូដែនសមុទ្រ រួមទាំងទំនាក់ទំនងពាណិជ្ជកម្ម សន្តិសុខដែនសមុទ្រ សេរីភាពនៃការធ្វើនាវាចរណ៍ និងការប្រើប្រាស់បច្ចេកវិទ្យាទំនើប ដើម្បីបង្កើនសន្តិសុខ និងការគ្រប់គ្រងកំពង់ផែ។

ទីភ្នាក់ងារព័ត៌មាន Oman បានរាយការណ៍ថា សន្និសីទនេះ មានគោលបំណងធ្វើឲ្យប្រសើរឡើងនូវកិច្ចសហប្រតិបត្តិការក្នុងតំបន់ និងដោះស្រាយបញ្ហាប្រឈមនានា ដែលតំបន់មហាសមុទ្រឥណ្ឌាកំពុងជួប ប្រទះ។