លោកប្រធានាធិបតី Donald Trump បានព្រមានកាលពីថ្ងៃអង្គារ ទី៤ កុម្ភៈ សប្ដាហ៍នេះថានឹងផ្ទុះអំពើហិង្សាបន្ថែមទៀត ប្រសិនបើកិច្ចព្រមព្រៀងចំណាប់ខ្មាំងរវាងក្រុមហាម៉ាស និងអ៊ីស្រាអែល បរាជ័យ ក្នុងជំនួបជាមួយនាយករដ្ឋមន្ត្រីអ៊ីស្រាអែល Benjamin Netanyahu នៅសេតវិមាន។

ការិយាល័យរបស់លោកនាយករដ្ឋមន្ត្រី Benjamin Netanyahu បាននិយាយកាលពីថ្ងៃអង្គារសប្ដាហ៍នេះ ថា ប្រទេសអ៊ីស្រាអែលកំពុងរៀបចំបញ្ជូនគណៈប្រតិភូជាន់ខ្ពស់ទៅកាន់រដ្ឋធានី Doha ប្រទេសកាតា ដើម្បីពិភាក្សាអំពីការបន្តអនុវត្តកិច្ចព្រមព្រៀងបទឈប់បាញ់នៅតំបន់ហ្កាហ្សា។

ក្រោមលក្ខខណ្ឌនៃកិច្ចព្រមព្រៀងដំបូងដែលបានឈានដល់បទឈប់បាញ់រយៈពេល ៤២ ថ្ងៃ និងការដោះដូរចំណាប់ខ្មាំងជាថ្នូរអ្នកទោសប៉ាឡេស្ទីន ការពិភាក្សាលើដំណាក់កាលទីពីរដែលត្រួសត្រាយផ្លូវឆ្ពោះទៅរកការបញ្ចប់សង្គ្រាមដែលអាចធ្វើទៅបាន បានចាប់ផ្តើមកាលពីថ្ងៃអង្គារទី៤កុម្ភៈសប្ដាហ៍នេះ។

សេចក្តីប្រកាសនេះបានកើតមានឡើងក្រោយសំណើដ៏គួរឱ្យភ្ញាក់ផ្អើលរបស់លោក Trump កាលពីថ្ងៃអង្គារសប្ដាហ៍នេះដែរ សម្រាប់ការតាំងទីលំនៅអចិន្ត្រៃយ៍របស់ជនជាតិប៉ាឡេស្ទីនចេញពីតំបន់ហ្កាហ្សាទៅកាន់ប្រទេសជិតខាង ដោយហៅតំបន់ឡោមព័ទ្ធ ជាដែលបទឈប់បាញ់ដំបូងដ៏ផុយស្រួយកំពុងចូលជាធរមាន ថាជាទីតាំងត្រូវកម្ទេចចោល។

លោកTrump បាននិយាយថា សហរដ្ឋអាមេរិកនឹងកាន់កាប់តំបន់ហ្កាហ្សាស្ទ្រីប បន្ទាប់ពីជនជាតិប៉ាឡេស្ទីនត្រូវបានតាំងទីលំនៅថ្មីនៅកន្លែងផ្សេង ហើយអភិវឌ្ឍតំបន់នេះឱ្យមានលក្ខណៈសេដ្ឋកិច្ច ជាវិធានការមួយ ដែលនឹងធ្វើឱ្យប៉ះពាល់គោលនយោបាយជាច្រើនទសវត្សរ៍របស់សហរដ្ឋអាមេរិកចំពោះជម្លោះអ៊ីស្រាអែល និងប៉ាឡេស្ទីន៕