ក្រសួងការបរទេសសហរដ្ឋអាមេរិក បានបញ្ជាឱ្យបិទបេសកកម្មក្រៅប្រទេសរបស់ទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិ ឬហៅថាអង្គការ USAID ហើយកំពុងធ្វើការដើម្បីប្រមូលបុគ្គលិករាប់ពាន់នាក់នៅទូទាំងពិភពលោកមកវិញ នេះបើតាមប្រភពពីរដែលដឹងពីការពិភាក្សានេះបាននិយាយកាលពីថ្ងៃអង្គារ (០៤ កុម្ភៈ)។

ចំណាត់ការនេះកើតឡើងនៅពេលរដ្ឋបាលថ្មីរបស់លោកប្រធានាធិបតី Donald Trump កំពុងប្រឹងប្រែងដាក់បញ្ចូលទីភ្នាក់ងារមនុស្សធម៌ចម្បងរបស់ទីក្រុងវ៉ាស៊ីនតោន USAID ដែលចែកចាយជំនួយមានតម្លៃរាប់ពាន់លានដុល្លារនៅបរទេស ឱ្យនៅជាមួយក្រសួងការបរទេស និងរុះរើទីភ្នាក់ងារនេះមិនឱ្យជាអង្គភាពឯករាជ្យយ៉ាងមានប្រសិទ្ធភាព។

ប្រភពនិយាយថា លោក Peter Marocco ដែលជាមន្ត្រីតែងតាំងថ្មីរបស់លោក Trump មានភារកិច្ចត្រួតពិនិត្យប្រតិបត្តិការរបស់ទីភ្នាក់ងារនេះ បានប្រាប់មន្ត្រីក្រសួងការបរទេសកាលពីថ្ងៃអង្គារថា បុគ្គលិក USAID ទាំងអស់ និងក្រុមគ្រួសាររបស់ពួកគេគួរតែត្រូវកោះហៅមកវិញនៅត្រឹមថ្ងៃសុក្រ សប្ដាហ៍នេះ ប៉ុន្តែថ្ងៃកំណត់នេះក៏អាចត្រូវពន្យារពេលផងដែរ។

កម្មវិធី USAID រាប់រយ ដែលគ្របដណ្តប់លើជំនួយសង្គ្រោះជីវិតមានតម្លៃរាប់ពាន់លានដុល្លារនៅទូទាំងពិភពលោក បានឈប់ដំណើរការបន្ទាប់ពីលោក Trump កាលពីថ្ងៃទី២០ ខែមករា បានបញ្ជាឱ្យបង្កកជំនួយបរទេសភាគច្រើនរបស់អាមេរិក ដោយសារលោកចង់ធានាថា ជំនួយទាំងនោះស្របតាមគោលនយោបាយ "យកអាមេរិកជាធំ" របស់លោក៕