ប្រធានាធិបតីម៉ិកស៊ិក លោកស្រី ក្លៅឌៀ សេនបោម(Claudia Sheinbaum) កាលពីថ្ងៃអង្គារ បាននិយាយសម្រាលពីផលប៉ះពាល់នៃផែនការរបស់ប្រទេសអេក្វាឌ័រ ក្នុងការដំឡើងពន្ធ២៧ភាគរយលើទំនិញមកពីប្រទេសម៉ិកស៊ិក ដោយនិយាយថាពាណិជ្ជកម្មរវាងប្រទេសទាំងពីរ គ្រាន់តែជាផ្នែកតូចមួយនៃការនាំចេញរបស់ប្រទេសម៉ិកស៊ិក ប៉ុណ្ណោះ។

លោកស្រី Sheinbaum បាននិយាយទៅកាន់អ្នកសារព័ត៌មានក្នុងសន្និសីទសារព័ត៌មានប្រចាំថ្ងៃរបស់លោកស្រី ថា «កាលពីម្សិលមិញខ្ញុំ បានសួរថាតើយើងនាំចូលពីប្រទេសអេក្វាឌ័រចំនួនប៉ុន្មាន ខ្ញុំគិតថាវាមានត្រឹមតែ ០,៤ ភាគរយនៃការនាំចូលសរុបរបស់ម៉ិកស៊ិក។

ប្រធានាធិបតីអេក្វាឌ័រ លោក Daniel Noboa បាននិយាយកាលពីថ្ងៃចន្ទថា ប្រទេសលោកនឹងដាក់ពន្ធបន្ថែម២៧ភាគរយ លើផលិតផលដែលនាំចូលពីប្រទេសម៉ិកស៊ិក ដើម្បីជំរុញការផលិតក្នុងស្រុក។

នៅក្នុងការបង្ហោះនៅលើវេទិកាបណ្តាញសង្គម X លោក Noboa បាននិយាយថា «ប្រទេសអេក្វាឌ័រថ្មីតែងតែបើកចំហសម្រាប់ការធ្វើសមាហរណកម្មពាណិជ្ជកម្ម ប៉ុន្តែពុំមែននៅពេលដែលមានការរំលោភបំពាននោះទេ»។

ប្រទេសអេក្វាឌ័រ និងម៉ិកស៊ិក បានផ្តាច់ទំនាក់ទំនងផ្នែកការទូតនៅក្នុងខែមេសា ឆ្នាំ២០២៤ បន្ទាប់ពីនគរបាលប្រទេសអេក្វាឌ័រ បានឆ្មក់ចូលស្ថានទូតម៉ិកស៊ិកក្នុងទីក្រុងគីតូ ដើម្បីចាប់ខ្លួនអតីតអនុប្រធានាធិបតី លោក Jorge Glas ដែលបានស្វែងរកការជ្រកកោននៅទីនោះ។