ដែនដី Greenland កាលពីថ្ងៃអង្គារ (ទី៥ ខែកុម្ភៈ) បានអនុម័តច្បាប់ហាមប្រាមមិនឲ្យមានការចូលរួមវិភាគទានពីបរទេស ចំពោះគណបក្សនយោបាយ ដែលជាការអះអាងពីរដ្ឋបាលស្វ័យគ្រប់គ្រង ចំពេលមានការព្រួយបារម្ភ ចំពោះការអំពាវនាវរបស់ប្រធានាធិបតីលោក Donald Trump ឲ្យសហរដ្ឋអាមេរិកដណ្ដើមកោះនេះមកកាន់កាប់។

Greenland គឺជាដែនដីស្វយ័តរបស់ប្រទេសដាណឺម៉ាក ដែលមន្ត្រីរបស់កោះនេះបានសង្កត់ធ្ងន់ម្តងហើយម្តងទៀតថា ការលក់ដូរនឹងមិនកើតឡើងជាដាច់ខាត។ ហើយមេដឹកនាំនៅទីក្រុង Nuuk រដ្ឋធានីរបស់ Greenland បាននិយាយផងដែរថា ប្រជាជនរបស់ខ្លួនមិនចង់ក្លាយជាផ្នែកមួយរបស់សហរដ្ឋអាមេរិកនោះទេ។ នៅពេលត្រូវបានសួរពាក់ព័ន្ធនឹងដែនដីនេះ លោក Trump បានបដិសេធមិនច្រានចោល «ការបង្ខិតបង្ខំផ្នែកយោធា ឬសេដ្ឋកិច្ច» នោះឡើយ ដើម្បីអនុវត្តកិច្ចការបែបនេះ។

នៅក្នុងសេចក្តីថ្លែងការណ៍មួយ មុនពេលអនុម័តសេចក្ដីស្នើច្បាប់ រដ្ឋាភិបាលរបស់ដែនដី Greenland បានប្រាប់ឲ្យដឹងថា ខ្លួនមានគោលបំណងការពារ «បូរណភាពនយោបាយ» របស់ប្រទេសនេះ ហើយថា កោះនេះត្រូវតែមើលឃើញពីរបៀបដែលច្បាប់នេះតំណាងឲ្យ ក្រោយ «មហាអំណាចមួយ បានបង្ហាញចំណាប់អារម្មណ៍ចង់កាន់កាប់ និងគ្រប់គ្រង Greenland»។ រដ្ឋាភិបាលមិនបានដាក់ឈ្មោះយ៉ាងច្បាស់លាស់ អំពីសហរដ្ឋអាមេរិកនោះឡើយ។

ច្បាប់នេះដាក់បម្រាមដល់គណបក្សនយោបាយ ក្នុងរួមទាំងសាខាក្នុងស្រុក និងយុវជន មិនឲ្យទទួលអំណោយពីអ្នកបរិច្ចាគអនាមិក ឬបរទេស។ តែមានករណីលើកលែង ដែលកំណត់ថា គណបក្សនយោបាយ នៅដែនដី Greenland អាចទទួលវិភាគទានពីគណបក្សបងប្អូន នៅក្នុងសភាដាណឺម៉ាក៕