មន្ត្រីក្នុងតំបន់ និងអង្គការសហប្រជាជាតិ បាននិយាយកាលពីថ្ងៃអង្គារថា ការវាយលុករបស់យោធាអ៊ីស្រាអែល នៅក្នុងជំរំជនភៀសខ្លួនពីរ នៅតំបន់វេសបែង (West Bank) បានជម្លៀសប្រជាជនប៉ាឡេស្ទីនជិត ៥.៥០០គ្រួសារ ចាប់តាំងពីខែធ្នូមក ចំពេលមានអំពើហិង្សាកាន់តែខ្លាំងឡើង នៅក្នុងទឹកដីដែលគ្រប់គ្រង ដោយអ៊ីស្រាអែលនេះ។

យោធាអ៊ីស្រាអែល ពិពណ៌នាប្រតិបត្តិការដែលកំពុងបន្តរបស់ខ្លួនថា ជាកិច្ចប្រឹងប្រែងប្រឆាំងភេរវកម្ម ដែលមានគោលបំណងកម្ចាត់ក្រុមសកម្មប្រយុទ្ធប៉ាឡេស្ទីនឲ្យអស់។

លោក Jonathan Fowler អ្នកនាំពាក្យរបស់ទីភ្នាក់ងារអង្គការសហប្រជាជាតិសម្រាប់ជនភៀសខ្លួនប៉ាឡេស្ទីន (UNRWA) បាននិយាយថា ប្រជាជនប្រហែលពី ២.៤៥០ ទៅ ៣.០០0 គ្រួសារ ត្រូវបានជម្លៀស ចេញពីជំរំជនភៀសខ្លួន Tulkarem។

លោក Faisal Salama ដែលជាប្រធានគណៈកម្មាធិការប្រជាប្រិយនៃជំរំនេះ បានប៉ាន់ប្រមាណថា ៨០ ភាគរយនៃអ្នកស្រុក ១៥.000នាក់ នៅក្នុងជំរំ ត្រូវបានផ្លាស់ទីលំនៅ។

ទាំងលោក Salama និង លោក Fowler បាននិយាយថា ការទទួលបានតួលេខច្បាស់លាស់ គឺមានបញ្ហាប្រឈម ដោយសារតែស្ថានភាពសន្តិសុខ នៅក្នុងជំរំនេះ និងចំនួនប្រជាជន កំពុងមានការប្រែប្រួល។