បើយោងតាមសេចក្ដីរាយការណ៍របស់វេបសាយព័ត៌មាន Semafor កាលពីថ្ងៃអង្គារ (ទី៤ ខែកុម្ភៈ) បានឲ្យដឹងថា សហរដ្ឋអាមេរិកកំពុងពិភាក្សាថា តើត្រូវបន្ថែមក្រុមហ៊ុនលក់រាយតាមប្រព័ន្ធអេឡិចត្រូនិករបស់ចិន គឺ Shein និង Temu ទៅក្នុងបញ្ជីប្រើ «ពលកម្មដោយបង្ខំ» របស់នាយកដ្ឋានសន្តិសុខមាតុភូមិ (DHS) ដែរ ឬយ៉ាងណា។

ដោយដកស្រង់ប្រភពចំនួន ២ ដែលដឹងពីការពិភាក្សានេះ សេចក្ដីរាយការណ៍នោះ បានឲ្យដឹងទៀតថា រដ្ឋបាលរបស់លោក Donald Trump មិនទាន់បានធ្វើការសម្រេចចុងក្រោយលើបញ្ហានេះនៅឡើយទេ ហើយនៅទីបំផុត អាចសម្រេចមិនចុះបញ្ជីទាំង២ ក៏ថាបាន។

ចំណាត់ការនេះកើតឡើងបន្ទាប់ពីប្រទេសចិន បានដាក់គោលដៅដំឡើងពន្ធលើការនាំចូលរបស់សហរដ្ឋអាមេរិក ហើយបានត្រួតពិនិត្យលើក្រុមហ៊ុនមួយចំនួន ក្នុងនោះរួមទាំងក្រុមហ៊ុនបច្ចេកវិទ្យា Google របស់ក្រុមហ៊ុន Alphabet Inc ផងដែរ ដែលអាចរងទណ្ឌកម្ម នាពេលខាងមុខ ដោយនេះជាចំណាត់ការឆ្លើយតប ចំពោះការយកពន្ធរបស់ប្រធានាធិបតីអាមេរិក លោក Donald Trump ដែលបានចូលជាធរមានកាលពីថ្ងៃអង្គារ។

DHS និង Temu ដែលជាក្រុមហ៊ុនបុត្រសម្ព័ន្ធនៃក្រុមហ៊ុនលក់តាមប្រព័ន្ធអេឡិចត្រូនិករបស់ចិន គឺ PDD Holdings និងក្រុមហ៊ុន Shein ដែលមានទីស្នាក់ការនៅប្រទេសសិង្ហបុរី មិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយរបស់សារព័ត៌មាន Reuters៕