សារព័ត៌មាន Fox News ដែលមានមូលដ្ឋាននៅសហរដ្ឋអាមេរិក បានរាយការណ៍ថា យន្តហោះរបស់ក្រុមហ៊ុន Japan Airlines និងយន្តហោះក្រុមហ៊ុន Delta Air Lines បានបុកគ្នានៅលើដី ក្នុងអាកាសយានដ្ឋានអន្តរជាតិ Seattle-Tacoma កាលពីថ្ងៃពុធសប្ដាហ៍នេះ។ឧបទ្ទវហេតុនេះកើតឡើងត្រឹមតែមួយសប្តាហ៍បន្ទាប់ពីយន្តហោះរបស់ក្រុមហ៊ុនអាកាសចរណ៍អាមេរិក បានបុកជាមួយឧទ្ធម្ភាគចក្រយោធាHawkនៅកណ្តាលអាកាសក្នុងទីក្រុងវ៉ាស៊ីនតោនឌីស៊ីសម្លាប់មនុស្សទាំងអស់ចំនួន៦៧ នាក់។

ការបុកគ្នានេះបានកើតឡើងនៅពេលយន្តហោះទាំងពីរនៅលើដី ហើយមិនមានអ្នករងរបួសត្រូវបានគេរាយការណ៍ឡើយ។   អាកាសយានដ្ឋានអន្តរជាតិ Seattle-Tacoma (SEA) បាននិយាយនៅក្នុងការបង្ហោះប្រព័ន្ធផ្សព្វផ្សាយសង្គមថា ការិយាល័យពន្លត់អគ្គិភ័យ Port of Seattle Fire នគរបាល និងប្រតិបត្តិការ អាកាសយានដ្ឋានអន្តរជាតិ SEA បានឆ្លើយតបទៅនឹងឧបទ្ទវហេតុមួយ បន្ទាប់ពីម៉ោង១០និង១៥នាទីព្រឹកម៉ោងនៅសហរដ្ឋអាមេរិក។

រដ្ឋបាលអាកាសចរណ៍សហព័ន្ធបាននិយាយថា ស្លាបខាងស្តាំនៃយន្តហោះរបស់ក្រុមហ៊ុន Japan Airlines បានបុកកន្ទុយរបស់យន្តហោះ Delta Air Lines ខណៈយន្តហោះកំពុងរំកិលយឺតៗនៅឯអាកាសយានដ្ឋានអន្តរជាតិ Seattle-Tacoma កាលពីថ្ងៃពុធ ៥កុម្ភៈ។

យន្តហោះ Delta 737-800 ដែលមានអ្នកដំណើរ ១៤២ នាក់គ្រោងហោះហើរទៅកាន់ ទីក្រុងទេសចរណ៍ Puerto Vallarta របស់ម៉ិកស៊ិក នៅពេលត្រូវបានវាយប្រហារដោយយន្តហោះ Boeing 787-9 Dreamliner របស់ក្រុមហ៊ុន Japan Airlines បន្ទាប់ពីបានចុះចតក្រោយហោះហើរពីទីក្រុងតូក្យូ។ ក្រុមហ៊ុន Delta បាននិយាយថា មិនមានរបាយការណ៍អំពីការរងរបួសទេ ហើយខ្លួននឹងផ្ទេរអ្នកដំណើរទៅកាន់យន្តហោះមួយផ្សេងទៀត។ ក្រុមហ៊ុន Delta Air Linesបាននិយាយថា ខ្លួននឹងធ្វើការជាមួយរដ្ឋបាលអាកាសចរណ៍សហព័ន្ធ និងផ្នែកផ្សេងទៀតដើម្បីស៊ើបអង្កេតឧបទ្ទវហេតុនេះ៕