ការវាយប្រហាររបស់អ៊ីស្រាអែល បានធ្វើឲ្យខូចខាតដល់កន្លែងបុរាណវត្ថុចំនួន ២២៦ នៅតំបន់ហ្កាហ្សាក្នុងអំឡុងពេលសង្រ្គាម ដោយការចំណាយលើការជួសជុលត្រូវបានប៉ាន់ប្រមាណថា មានចំនួន ២៦១ លានអឺរ៉ូ។ នេះបើយោងតាមរបាយការណ៍ដែលចេញផ្សាយ ដោយក្រសួងទេសចរណ៍ និងវត្ថុបុរាណប៉ាឡេស្ទីន កាលពីថ្ងៃពុធ។

ក្រសួងបានបញ្ជាក់នៅក្នុងរបាយការណ៍របស់ខ្លួនស្តីពីទីតាំងបេតិកភណ្ឌវប្បធម៌ថា ការវាយតម្លៃការខូចខាត បានបង្ហាញថា ១៣៨កន្លែង បានរងការខូចខាតយ៉ាងធ្ងន់ធ្ងរ ៦១កន្លែង ខូចខាតមធ្យម និង ២៧កន្លែង ខូចខាតតិចតួច ខណៈដែល ៩០កន្លែង ស្ថិតនៅស្ថានភាពដដែល។

ក្រសួងបានចោទប្រកាន់កងកម្លាំងអ៊ីស្រាអែលថា បានកំណត់គោលដៅដោយចេតនាលើទីតាំងប្រវត្តិសាស្ត្រ ដែលខ្លួនពណ៌នាថា ជាមូលដ្ឋានសម្រាប់អត្តសញ្ញាណជាតិប៉ាឡេស្ទីន។

អ៊ីស្រាអែល បានចាប់ផ្តើមសង្រ្គាមទ្រង់ទ្រាយធំប្រឆាំងនឹងក្រុមប៉ាឡេស្ទីន នៅថ្ងៃទី ០៧ ខែតុលា ឆ្នាំ ២០២៣ បន្ទាប់ពីការវាយប្រហារដ៏គួរឲ្យភ្ញាក់ផ្អើលរបស់ក្រុមហាម៉ាសលើទីក្រុងភាគខាងត្បូងអ៊ីស្រាអែលដែលបណ្តាលឲ្យមនុស្សប្រហែល ១.២០០នាក់ ស្លាប់។ ការវាយប្រហាររបស់អ៊ីស្រាអែលនៅតំបន់ហ្កា ហ្សា បានសម្លាប់ជនជាតិប៉ាឡេស្ទីនជាង ៤៧.000នាក់ និងបានបង្កការខូចខាតយ៉ាងច្រើន នៅក្នុងតំបន់ហ្កាហ្សាស្រ្ទីប។