រដ្ឋមន្ត្រីការបរទេសអ៊ុយក្រែនលោក Andrii Sybiha បាននិយាយកាលពីថ្ងៃពុធថា អ៊ុយក្រែនចង់សហការជាមួយបណ្តាប្រទេសដៃគូលើគម្រោងក្រោយសង្រ្គាម ដែលមានតម្លៃរាប់ពាន់លានដុល្លារ មិនត្រឹមតែក្នុងការជីកយករ៉ែដ៏កម្រប៉ុណ្ណោះទេ ប៉ុន្តែថែមទាំងក្នុងវិស័យថាមពល និងសំណង់ ដើម្បីជួយកសាងប្រទេសឡើងវិញ។

លោក Sybiha បានឆ្លើយតបទៅនឹងការអត្ថាធិប្បាយរបស់លោកប្រធានាធិបតី ដូណាល់ ត្រាំ ( Donald Trump) ដែលបាននិយាយកាលពីថ្ងៃចន្ទថា លោកចង់ទទួលបានវត្ថុធាតុកម្រដ៏មានតម្លៃរបស់អ៊ុយក្រែន ដើម្បីជាលក្ខខណ្ឌសម្រាប់ការបន្តការគាំទ្រសម្រាប់សង្រ្គាមរបស់ខ្លួនប្រឆាំងនឹងរុស្ស៊ី។

មន្ត្រីអ៊ុយក្រែន បាននិយាយថា រុស្ស៊ីចង់បានធនធានធម្មជាតិយ៉ាងច្រើនសន្ធឹកសន្ធាប់របស់ប្រទេសអ៊ុយក្រែន។

លោករដ្ឋមន្ត្រីការបរទេស បានលើកឡើងថា ទីក្រុងគីវ មានបំណងផ្តល់«ការធានាដល់វត្តមានរបស់អាជីវកម្មធំៗ នៅក្នុងអ៊ុយក្រែន និងផលប្រយោជន៍របស់សម្ព័ន្ធមិត្តជិតស្និទ្ធបំផុតរបស់យើង គឺសហរដ្ឋអាមេរិក ក្នុងការអភិវឌ្ឍលើធនធានដ៏កម្រទាំងនេះ និងធានាការការពារដល់ពួកគេ»។

លោកSybiha បាននិយាយនៅក្នុងសន្និសិទសារព័ត៌មានរួមជាមួយនឹងលោក David Lammy ដែលកំពុងបំពេញទស្សនកិច្ចថា កិច្ចសហប្រតិបត្តិការ មិនគួរត្រូវបានកំណត់ចំពោះវត្ថុធាតុកម្រនោះទេ។

លោកបានអះអាងថា អ៊ុយក្រែនមាន «សក្តានុពលដ៏ធំ» ដើម្បីក្លាយជាអ្នកធានាសន្តិសុខថាមពល នៅអឺរ៉ុប ដោយការទិញឧស្ម័នធម្មជាតិរាវពីសហរដ្ឋអាមេរិក ហើយរក្សាទុកវា នៅក្នុងធុងក្រោមដីដ៏ធំរបស់ខ្លួនសម្រាប់ចែកចាយ នៅពេលក្រោយ។