ការស្ទង់មតិភ្លាមៗលើអ្នកចេញពីកន្លែងបោះឆ្នោត បានបង្ហាញថា គណបក្ស Bharatiya Janata Party (BJP) របស់នាយករដ្ឋមន្ត្រីឥណ្ឌា លោក Narendra Modi ទំនងជានឹងវិលត្រលប់ទៅគ្រប់គ្រងរដ្ឋធានីរបស់ប្រទេសឥណ្ឌាវិញ ក្រោយរយៈពេលជិត ៣ទសវត្សរ៍ នៅក្នុងការបោះឆ្នោតមូលដ្ឋានដែលមានការប្រកួតប្រជែងយ៉ាងស្វិតស្វាញ។

បើយោងតាមការព្យាករណ៍របស់ស្ថាប័នស្ទង់មតិមួយចំនួន បានឲ្យដឹងថា បន្ទាប់ពីការបោះឆ្នោត កាលពីថ្ងៃពុធ (ទី៥ ខែកុម្ភៈ) គណបក្ស BJP អាចទទួលបានច្រើនជាង ៣៦កៅអី ក្នុងចំណោម ៧០អាសនៈ នៅក្នុងសភាទីក្រុងញូវដេលី។ គណបក្សនេះ បានគ្រប់គ្រងទីក្រុងញូវដេលីលើកចុងក្រោយ ក្នុងឆ្នាំ១៩៩៨។

គណបក្សកំពុងកាន់អំណាច Aam Aadmi ដែលមានន័យថា គណបក្សមនុស្សសាមញ្ញ បានគ្រប់គ្រងទីក្រុងញូវដេលី ចាប់តាំងពីឆ្នាំ២០១៥ ប៉ុន្តែកេរ្តិ៍ឈ្មោះបានធ្លាក់ចុះ ក្នុងប៉ុន្មានឆ្នាំថ្មីៗនេះ ដោយសារតែមានការចោទប្រកាន់ពីអំពើពុករលួយ ចំពោះមេដឹកនាំមួយចំនួនរបស់បក្ស។

ម៉្យាងវិញទៀត គណបក្ស BJP កំពុងឡើងប្រជាប្រិយភាព ក្នុងចំណោមប្រជាជនឥណ្ឌាវណ្ណៈកណ្តាល បន្ទាប់ពីបានកាត់បន្ថយពន្ធកម្រិតខ្ពស់បំផុត នៅក្នុងថវិកាប្រចាំឆ្នាំរបស់ប្រទេស កាលពីសប្តាហ៍មុន។

ទោះការស្ទង់មតិនេះមិនទាន់មានច្បាស់លាស់ក៏ពិតមែន ក៏ជ័យជម្នះរបស់បក្ស BJP នឹងបង្ហាញថា ប្រជាប្រិយភាពរបស់លោក Modi នៅតែខ្ពស់ ទោះបីជាគណបក្សរបស់លោក បានបាត់បង់សំឡេងភាគច្រើនដាច់ខាត នៅក្នុងការស្ទង់មតិជាតិ ក្នុងឆ្នាំ២០២៤ ក៏ដោយ។ លទ្ធផលផ្លូវការ សម្រាប់ការបោះឆ្នោតរដ្ឋធានីនេះ គ្រោងនឹងចេញនៅថ្ងៃទី៨ ខែកុម្ភៈ៕