ក្រសួងយុត្តិធម៌សហរដ្ឋអាមេរិក បានប្ដឹងរដ្ឋ អ៊ីលលីណយ (Illinois) និង ទីក្រុង ឈីកាហ្គោ (Chicago) កាលពីថ្ងៃព្រហស្បតិ៍ (០៦ កុម្ភៈ) ដោយចោទប្រកាន់មូលដ្ឋានដ៏រឹងមាំរបស់គណបក្សប្រជាធិបតេយ្យទាំងនេះថា បានជ្រៀតជ្រែកដោយខុសច្បាប់ជាមួយនឹងការបង្រ្កាបរបស់លោកប្រធានាធិបតីមកពីសាធារណរដ្ឋ Donald Trump លើការធ្វើអន្តោប្រវេសន៍ខុសច្បាប់ និងស្វះស្វែងរកដីការបស់តុលាការ ដែលរារាំងអ្វីដែលគេហៅថាច្បាប់ទីជម្រក។

ដោយលើកឡើងពីភាពអាសន្នជាតិទាក់ទងនឹងការធ្វើអន្តោប្រវេសន៍ខុសច្បាប់ដែលលោក Trump បានប្រកាសនៅថ្ងៃដំបូងនៃតំណែងរបស់លោកនៅថ្ងៃទី២០ ខែមករា ក្រសួងយុត្តិធម៌នៅក្នុងបណ្តឹងនេះ បានព្យាយាមរារាំងច្បាប់រដ្ឋ Illinois និងក្រុង Chicago មួយចំនួនដែល "ជ្រៀតជ្រែក និងរើសអើងប្រឆាំងនឹង" គោលនយោបាយអន្តោប្រវេសន៍របស់មេដឹកនាំអាមរិករូបនេះ។

ពាក្យបណ្តឹងនេះបាននិយាយថា ច្បាប់ទីជម្រកដូចជាច្បាប់ឈ្មោះថា TRUST របស់រដ្ឋ Illinois - ដែលរារាំងសមត្ថកិច្ចរបស់រដ្ឋ និងក្នុងតំបន់មិនឱ្យជួយដល់ការអនុវត្តច្បាប់អន្តោប្រវេសន៍សហព័ន្ធ - បានបំពានលើ "ប្រការឧត្ដមភាព" របស់រដ្ឋធម្មនុញ្ញសហរដ្ឋអាមេរិក ដែលចែងថា ច្បាប់សហព័ន្ធរារាំងច្បាប់រដ្ឋ និងមូលដ្ឋានទាំងឡាយណាដែលអាចមានជម្លោះជាមួយច្បាប់សហព័ន្ធ។

អ្នកគាំទ្រច្បាប់ទីជម្រកនិយាយថា កិច្ចសហប្រតិបត្តិការអនុវត្តច្បាប់ក្នុងតំបន់ ជាមួយការអនុវត្តច្បាប់អន្តោប្រវេសន៍សហព័ន្ធនេះ នឹងបង្អាក់ជនអន្តោប្រវេសន៍ដែលកំពុងរស់នៅក្នុងប្រទេសដោយខុសច្បាប់ ពីការចូលខ្លួនផ្ដល់ចម្លើយជាជនរងគ្រោះ ឬសាក្សីចំពោះឧក្រិដ្ឋកម្មណាមួយ៕