គណបក្ស Siumut ដែលកំពុងកាន់អំណាចរបស់ដែនដី Greenland បានឲ្យដឹងថា ខ្លួនគ្រោងនឹងរៀបចំការបោះឆ្នោតប្រជាមតិទាមទារឯករាជ្យ ក្រោយការបោះឆ្នោតសកល នាខែក្រោយ ដែលជាបញ្ហាដ៏បន្ទាន់មួយ ដោយសារប្រធានាធិបតីអាមេរិក លោក Donald Trump បានសម្តែងចំណាប់អារម្មណ៍ចង់បានកោះនេះទៅគ្រប់គ្រង។

កាលពីថ្ងៃពុធ (ទី៥ ខែកុម្ភៈ) ដែនដីពាក់កណ្តាលស្វយ័តដែលស្ថិតនៅក្រោមការគ្រប់គ្រងរបស់ព្រះរាជាណាចក្រដាណឺម៉ាក បានប្រកាសពីការបោះឆ្នោតសកល ដែលនឹងប្រព្រឹត្តទៅនៅថ្ងៃទី១១ ខែមីនា។

បញ្ហាឈានមុខគេ ក្នុងយុទ្ធនាការបោះឆ្នោត រួមមានគោលបំណងទទួលបានឯករាជ្យរបស់ដែនដី Greenland ព្រមទាំងទំនាក់ទំនងជាមួយដាណឺម៉ាក និងសហរដ្ឋអាមេរិកក្រោមការដឹកនាំរបស់លោក Trump ដែលបានបង្ហាញម្តងហើយម្តងទៀតនូវមហិច្ឆតាចង់ «បាន» កោះដ៏សំខាន់ជាយុទ្ធសាស្ត្រទៅកាន់កាប់។ កោះ Greenland ដែលជាដែនដីអាណានិគមរបស់ដាណឺម៉ាករហូតដល់ឆ្នាំ១៩៥៣ មានសិទ្ធិគ្រប់គ្រងខ្លួនឯងគ្រប់យ៉ាង។

អ្នកនាំពាក្យនយោបាយរបស់គណបក្ស លោកស្រី Doris Jensen បានប្រាប់សារព័ត៌មាន Reuters កាលពីថ្ងៃព្រហស្បតិ៍ថា គណបក្ស Siumut ដែលជាដៃគូនៅក្នុងរដ្ឋាភិបាលចម្រុះដឹកនាំដោយគណបក្ស ២ របស់ដែនដី Greenland គ្រោងនឹងលើកឡើងមកវិញនូវមាត្រានៃច្បាប់ឆ្នាំ២០០៩ ដែលបានផ្តល់សិទ្ធិឲ្យដែនដី Greenland បង្កើនស្វ័យភាព ក្នុងនោះរួមទាំងសិទ្ធិក្នុងការចរចាទាមទារឯករាជ្យពេញលេញផងដែរ។ លោកស្រី បានបញ្ជាក់ថា Greenland ចាំបាច់ត្រូវទទួលបានឯករាជ្យពីដាណឺម៉ាក ដើម្បីអាចចរចាពីអនាគតរបស់ខ្លួន៕