សារព័ត៌មាន CNN បានដកស្រង់សម្តីអ្នកនាំពាក្យវិមានក្រឹមឡាំង លោក Dmitry Peskov ដែលបាននិយាយថា ប្រធានាធិបតីរុស្ស៊ី លោក Vladimir Putin និងប្រធានាធិបតីអាមេរិក លោក Donald Trump មិនទាន់បានពិភាក្សា អំពីលទ្ធភាពនៃការមានកិច្ចប្រជុំនោះទេ។

លោក Peskov ដែលត្រូវបានដកស្រង់ដោយសារព័ត៌មាននេះ បាននិយាយថា មិនមានការទាក់ទងជាដំបូងនោះឡើយ រវាងមេដឹកនាំទាំង២ អំពីថា តើកិច្ចប្រជុំបែបនេះ មានភាពចាំបាច់ ឬនៅទីណា និងថា តើវាអាចនឹងកើតឡើងយ៉ាងដូចម្ដេច ប្រសិនបើវាកើតឡើង។

កាលពីថ្ងៃព្រហស្បតិ៍ (ទី៦ ខែកុម្ភៈ) ប្រធានគណៈកម្មាធិការកិច្ចការអន្តរជាតិរបស់សភារុស្ស៊ី លោក Leonid Slutsky ត្រូវបានទីភ្នាក់ងារសារព័ត៌មានរដ្ឋ RIA ដកស្រង់សម្តី ដែលបាននិយាយថា ការត្រៀមរៀបចំ សម្រាប់កិច្ចប្រជុំបែបនេះ គឺស្ថិតក្នុង «ដំណាក់កាលជិតបញ្ចប់ទាំងស្រុងហើយ» ហើយថា វាអាចប្រព្រឹត្តទៅក្នុងខែកុម្ភៈនេះតែម្ដង ឬខែមីនា។

កាលពីថ្ងៃពុធ លោក Peskov របស់វិមានក្រឹមឡាំង បាននិយាយថា ការទាក់ទងជាមួយក្រុមរបស់លោក Trump នៅកម្រិត «អង្គភាពមួយចំនួន» មានភាពរីកចម្រើនខ្លាំង ប៉ុន្តែបានបដិសេធមិនផ្តល់ព័ត៌មានលម្អិតបន្ថែម៕