ក្រុមហ៊ុន TikTok បាននិយាយកាលពីថ្ងៃសុក្រ (០៧ កុម្ភៈ) ថា ខ្លួនកំពុងតែអនុញ្ញាតឱ្យអ្នកប្រើប្រាស់ប្រព័ន្ធប្រតិបត្តិការ Android របស់សហរដ្ឋអាមេរិក ទាញយក និងភ្ជាប់ទៅកម្មវិធីវីដេអូខ្លីនេះតាមរយៈកញ្ចប់មួយនៅលើគេហទំព័ររបស់ខ្លួន ក្នុងកិច្ចខិតខំប្រឹងប្រែងដើម្បីជៀសឱ្យផុតពីការរឹតបន្តឹងលើអេបដ៏ពេញនិយមមួយនេះនៅសហរដ្ឋអាមេរិក។

គួរបញ្ជាក់ថា Apple និង Google មិនទាន់ដាក់បញ្ចូលអេប TikTok ឡើងវិញទៅក្នុងប្រព័ន្ធទាញយកកម្មវិធីរបស់ខ្លួនទេ ចាប់តាំងពីច្បាប់អាមេរិក បានចូលជាធរមាននៅថ្ងៃទី១៩ ខែមករា ដែលតម្រូវឱ្យម្ចាស់ក្រុមហ៊ុនចិន ByteDance លក់អេបនេះដោយហេតុផលសន្តិសុខជាតិ ឬប្រឈមនឹងការហាមឃាត់។

លោកប្រធានាធិបតី Donald Trump ដែលចូលកាន់តំណែងមួយថ្ងៃបន្ទាប់ពីច្បាប់នេះចូលជាធរមាន បានចុះហត្ថលេខាលើក្រឹត្យពន្យាពេលបម្រាមដល់ ៧៥ថ្ងៃនៃការអនុវត្តច្បាប់។ លោក Trump និយាយថា លោកកំពុងពិភាក្សាជាមួយមនុស្សជាច្រើនជុំវិញការទិញ TikTok ហើយទំនងជានឹងមានការសម្រេចលើអនាគតរបស់កម្មវិធីដែលមានអ្នកប្រើប្រាស់អាមេរិកប្រហែល ១៧០លាននាក់នេះ នៅក្នុងខែនេះ។

ប្រធានាធិបតីអាមេរិករូបនេះបានចុះហត្ថលេខាលើក្រឹត្យថ្មីមួយកាលពីថ្ងៃចន្ទសប្ដាហ៍នេះ ដោយបញ្ជាឱ្យបង្កើតមូលនិធិទ្រព្យសម្បត្តិអធិបតេយ្យភាពឱ្យរួចនៅឆ្នាំក្រោយ ដោយនិយាយថាមូលនិធិនោះអាចប្រើដើម្បីទិញ TikTok បាន៕