ប្រធានាធិបតីអាមេរិក លោក Donald Trump បានលើកឡើងកាលពីថ្ងៃអាទិត្យ (០៩ កុម្ភៈ) ថា លោកកំពុងតែបាត់បង់ការអត់ធ្មត់ជាមួយនឹងកិច្ចព្រមព្រៀងបទឈប់បាញ់រវាងអ៊ីស្រាអែល និងក្រុមហាម៉ាសហើយ បន្ទាប់ពីបានឃើញវីដេអូរបស់ក្រុមសកម្មប្រយុទ្ធប៉ាឡេស្ទីនដោះលែងចំណាប់ថ្នូរអ៊ីស្រាអែល កាលពីចុងសប្តាហ៍ ដោយលោកប្រៀបធៀបស្ថានភាពចំណាប់ថ្នូរនោះទៅនឹងអ្នករស់រានមានជីវិតពីហេតុការណ៍សម្លាប់រង្គាលក្នុងសង្រ្គាមលោកលើកទីពីរ។

ប្រតិកម្មមិនសប្បាយចិត្តរបស់លោក Trump ចំពោះការឃើញស្ថានភាពអាក្រក់របស់ចំណាប់ថ្នូរទាំង ៣នាក់ ដែលមើលទៅហាក់បីដូចជាស្លេកស្លាំងបាត់បង់ស្មារតីពេលដោះលែងពួកគេកាលពីថ្ងៃសៅរ៍ បាននាំមកនូវភាពមិនប្រាកដប្រជាថ្មីពីជោគវាសនានៃកិច្ចព្រមព្រៀងនេះ មុនពេលចំណាប់ថ្នូរនៅសល់ ៧៦នាក់ទៀតត្រូវដោះលែង ហើយបានកើតមានឡើងប៉ុន្មានថ្ងៃប៉ុណ្ណោះបន្ទាប់ពីប្រធានាធិបតីរូបនេះបានអំពាវនាវឱ្យដកជនជាតិប៉ាឡេស្ទីនចេញពីដែនដីហ៊ុមព័ទ្ធនោះ និងឱ្យអាមេរិក ជាអ្នកគ្រប់គ្រង។

លោក Trump បានប្រាប់អ្នកយកព័ត៌មានក្នុងអំឡុងពេលហោះហើរទៅចូលរួមទស្សនាការប្រកួតកីឡា Super Bowl ថា "ចំណាប់ថ្នូរមើលទៅដូចជាអ្នកទើបរួចជីវិតពីការសម្លាប់រង្គាល។ ស្ថានភាពពួកគេអាក្រក់មើលណាស់ ហើយយើងមិនដឹងថាអាចទ្រាំមើលបែបនេះបានយូរប៉ុណ្ណាទេ នៅពេលណាមួយយើងនឹងអស់ភាពអត់ធ្មត់មិនខាន"។

គួរបញ្ជាក់ថា បុរសចំណាប់ថ្នូរទាំងបីនាក់នោះបានបង្ហាញខ្លួនក្នុងស្ថានភាពទ្រុឌទ្រោមជាងចំណាប់ថ្នូរ ១៨នាក់ផ្សេងទៀតដែលត្រូវបានដោះលែងពីមុន នៅក្រោមបទឈប់បាញ់ក្នុងខែមករា នៃសង្រ្គាមហ្កាហ្សាដ៏បង្ហូរឈាមជាង ១៥ខែ។ អ្នកទោសប៉ាឡេស្ទីនជាច្រើននាក់ដែលអ៊ីស្រាអែលបានដោះលែងក៏មានរូបរាងស្គមស្គាំងស្លេកស្លាំងដែរ៕