ប្រធានាធិបតីអាមេរិក លោក Donald Trump បាននិយាយកាលពីថ្ងៃអាទិត្យ (០៩ កុម្ភៈ) ថា លោកនឹងដាក់ចេញកាលដំឡើងពន្ធថ្មីចំនួន ២៥% លើការនាំចូលដែក និងអាលុយមីញ៉ូមទាំងអស់ទៅកាន់សហរដ្ឋអាមេរិក ដោយលើសពីពន្ធលោហៈដែលមានស្រាប់ នៅក្នុងការបង្កើនភាពតានតឹងដ៏សំខាន់មួយទៀតនៃការផ្លាស់ប្តូរគោលនយោបាយពាណិជ្ជកម្មរបស់លោក។

លោក Trump បានប្រាប់អ្នកយកព័ត៌មាននៅលើយន្តហោះ Air Force One ដែលកំពុងធ្វើដំណើរទៅចូលរួមកីឡា Super Bowl ថា លោកនឹងប្រកាសពន្ធលោហៈថ្មីនោះនៅថ្ងៃចន្ទ (១០ កុម្ភៈ) នេះ។

លោកក៏លើកឡើងផងដែរថា លោកនឹងប្រកាស “ពន្ធទៅមក” នៅថ្ងៃអង្គារ ឬថ្ងៃពុធសប្ដាហ៍នេះ ដែលនឹងចូលជាធរមានស្ទើរតែភ្លាមៗ ដោយអនុវត្តទៅលើគ្រប់ប្រទេសទាំងអស់ ហើយមានន័យថា អត្រាពន្ធនឹងដូចគ្នាទៅនឹងអត្រាដែលដាក់ចេញដោយប្រទេសនីមួយៗលើសហរដ្ឋអាមេរិក។

លោក Trump បាននិយាយពីផែនការពន្ធទៅមកនោះថា៖ "រឿងនេះគឺសាមញ្ញណាស់ ប្រសិនបើពួកគេគិតប្រាក់ពីយើង យើងក៏គិតប្រាក់ពីពួកគេដូចគ្នា"។ គួររម្លឹកថា លោក Trump ក្នុងអំឡុងពេលអាណត្តិដំបូងរបស់ខ្លួន បានដំឡើងពន្ធ ២៥% លើដែកថែប និង ១០% លើអាលុយមីញ៉ូម ប៉ុន្តែក្រោយមកបានផ្តល់ការលើកលែងពន្ធលើដៃគូពាណិជ្ជកម្មមួយចំនួន រួមទាំងកាណាដា ម៉ិកស៊ិក និងប្រេស៊ីលជាដើម៕