ការរង្គោះរង្គើជាប្រវត្តិសាស្ត្រនៃមជ្ឈិមបូព៌ា ដែលកំពុងលេចរូបរាងថ្មី បានចាប់ផ្តើមទាក់ទាញអ្នកវិនិយោគអន្តរជាតិ ដែលកំពុងតែកក់ក្តៅនឹងគំនិតនៃសន្តិភាពនៅពេលអនាគត និងការស្តារសេដ្ឋកិច្ចឡើងវិញ បន្ទាប់ពីមានភាពចលាចលយ៉ាងខ្លាំង ប៉ុន្តែទំនោរនោះអាចនឹងត្រូវបង្អាក់ដោយសារតែក្ដីកង្វល់ចំពោះលោកប្រធានាធិបតីអាមេរិក Donald Trump។

សំណើរបស់លោក Trump ដែលថាសហរដ្ឋអាមេរិក កាន់កាប់តំបន់ហ្កាហ្សា ប្រហែលជាបានបង្កើតការព្រួយបារម្ភ ប៉ុន្តែបទឈប់បាញ់ដ៏ផុយស្រួយក្នុងសង្គ្រាមអ៊ីស្រាអែល-ហាម៉ាស ការបណ្តេញលោក Bashar al-Assad ចេញពីប្រទេសស៊ីរី អ៊ីរ៉ង់ដែលចុះខ្សោយ និងរដ្ឋាភិបាលថ្មីនៅលីបង់ បានចិញ្ចឹមក្តីសង្ឃឹមនៃការស្ដារឡើងវិញនៃសណ្ដាប់ធ្នាប់ក្នុងតំបន់មជ្ឈិមបូព៌ា។

អេហ្ស៊ីប ដែលជាប្រទេសមានប្រជាជនច្រើនជាងគេក្នុងតំបន់ និងជាអ្នកចរចាដ៏សំខាន់ក្នុងកិច្ចចរចាសន្តិភាពនាពេលថ្មីៗនេះ ទើបតែបានគ្រប់គ្រងការលក់បំណុលប្រាក់ដុល្លារជាលើកដំបូងរបស់ខ្លួនក្នុងរយៈពេល ៤ឆ្នាំ ខណៈកាលពីមុន ប្រទេសនេះបានប្រឈមនឹងបញ្ហាសេដ្ឋកិច្ច។ វិនិយោគិនបានចាប់ផ្តើមទិញមូលបត្របំណុលរបស់អ៊ីស្រាអែលម្តងទៀត ហើយអ្នកនៅលីបង់បានភ្នាល់ថា ទីបំផុតទីក្រុងបេរូត អាចនឹងចាប់ផ្តើមជួសជុលវិបត្តិនយោបាយ សេដ្ឋកិច្ច និងហិរញ្ញវត្ថុដែលជាប់ពាក់ព័ន្ធរបស់ខ្លួន។

លោក Charlie Robertson អ្នកវិភាគទីផ្សារជើងចាស់មកពីស្ថាប័ន FIM Partners បាននិយាយថា សំណួរចម្រាប់វិនិយោគិននៅពេលនេះគឺថា តើផែនការហ្កាហ្សារបស់លោក Trump អាចធ្វើឱ្យមានភាពតានតឹងម្តងទៀត ឬយ៉ាងណា ទើបអ្នកវិនិយោគចូលទៅដោយមិនមានក្ដីបារម្ភ៕