ស្ថានទូតចិន នៅទីក្រុងវ៉ាស៊ីនតោន បាននិយាយនៅក្នុងសេចក្តីថ្លែងការណ៍មួយកាលពីថ្ងៃអាទិត្យ (០៩ កុម្ភៈ) ថា ពន្ធសងសឹករបស់ប្រទេសចិន ពីតួលេខ ១០% ទៅ ១៥% លើទំនិញរបស់សហរដ្ឋអាមេរិក បានចូលជាធរមានហើយ។ ពន្ធបន្ថែមនោះនឹងប៉ះពាល់ដល់ទំនិញដែលមានតម្លៃ ១៤ពាន់លានដុល្លារ ហើយនិងក្ដីសង្ឃឹម ដែលថានឹងបញ្ចៀសកំណើនសង្គ្រាមពាណិជ្ជកម្មរវាងប្រទេសដែលមានសេដ្ឋកិច្ចធំបំផុតនៃពិភពលោកទាំងពីរ។

ពន្ធនេះត្រូវបានដាក់លើទំនិញមួយចំនួនរួមមាន ឧស្ម័នធម្មជាតិ LNG ប្រេងឆៅ ធ្យូងថ្ម ឧបករណ៍កសិកម្ម និងទំនិញផ្សេងទៀត។ ការប្រកាសពន្ធសងសឹករបស់ទីក្រុងប៉េកាំង បានកើតឡើងភ្លាមៗបន្ទាប់ពីលោកប្រធានាធិបតី Donald Trump បាននិយាយថា រដ្ឋាភិបាលសហរដ្ឋអាមេរិក នឹងដាក់ពន្ធ ១០% លើទំនិញទាំងអស់របស់ចិន ដែលធ្វើអោយសង្រ្គាមពាណិជ្ជកម្មរវាងគូប្រជែងទាំងពីរកើតឡើង។

ទីក្រុងប៉េកាំងក៏បានប្រកាសពីការស៊ើបអង្កេតលើ Google ដោយនិយតករប្រឆាំងការផ្តាច់មុខ នៅក្នុងសកម្មភាពសងសឹកជាក់ស្តែងមួយផ្សេងទៀត។ ទោះបីជាយ៉ាងណាក៏ដោយ គេជឿថា ជំហានរបស់ចិននេះបានបន្សល់ទុកកន្លែងខ្លះសម្រាប់ការចរចាជាមួយទីក្រុងវ៉ាស៊ីនតោន ដើម្បីបន្ថយភាពតានតឹង។

ប៉ុន្តែរបាយការណ៍របស់សារព័ត៌មាន FT បាននិយាយថា មិនមានកិច្ចព្រមព្រៀងណាមួយមុនពេលកំណត់នៅថ្ងៃអាទិត្យ ០៩ កុម្ភៈ នេះទេ ហើយពន្ធបន្ថែមនោះបានចូលជាធរមាននៅម៉ោង ១១:០១ នាទីព្រឹក ម៉ោងនៅទីក្រុងវ៉ាស៊ីនតោនឌីស៊ី៕