នៅថ្ងៃចន្ទនេះ ក្រុមភ្នាកងារពន្លត់អគ្គិភ័យនាំគ្នាពន្លត់អណ្តាតភ្លើងឆាបឆេះរថយន្តជាច្រើនគ្រឿងនៅទីក្រុងភាគឦសាន Sumy ក្រោយក្រុមមន្រ្តីអ៊ុយក្រែន និយាយថា វាគឺជាការវាយប្រហារដោយយានដ្រូនរុស្ស៊ី ។

ស្រ្តីវ័យ ៣៨ឆ្នាំម្នាក់ ត្រូវបានបញ្ជូលទៅព្យាបាលនៅមន្ទីរពេទ្យ ក្រោយរុស្ស៊ីបើកការវាយប្រហារដោយយានដ្រូនលើទីក្រុង Sumy ដែលជាមជ្ឈមណ្ឌលរដ្ឋបាលនៃតំបន់ Sumy ។ នេះបើយោងតាមការអះអាងនៅលើបណ្តាញព័ត៌មានសង្គម Telegramរបស់អភិបាលតំបន់ Sumy លោក Ihor Kalchenko ។ លោកបន្តថា ផ្ទះ ៥ខ្នងរងការខូចខាតផងដែរ ។

រូបភាពវីដេអូឃ្លីបចេញដោយសេវាកម្មសង្រ្គោះបន្ទាន់តំបន់ Sumy ឃើញបុគ្គលិកសង្រ្គោះបន្ទាន់ ព្យាយាមពន្លត់ភ្លើងឆាបឆេះរថយន្តរាប់សិបគ្រឿងនៅមុខអគារខ្ពស់ៗដែលរងការឆាបឆេះផងដែរ ។

 ក្រុមមន្រ្តីអ៊ុយក្រែននិយាយនៅថ្ងៃចន្ទនេះថា ដោយឡែក កាលពីយប់កន្លងទៅ ការវាយប្រហារដោយយានដ្រូនរុស្ស៊ី បង្កឲ្យកើតមានអគ្គិភ័យផងដែរនៅក្នុងទីក្រុងគីវ ។

 យោធាអ៊ុយក្រែន និយាយនៅថ្ងៃចន្ទនេះថា ពួកគេបានបាញ់ទម្លាក់យានដ្រូន ៦១គ្រឿង ក្នុងចំណោមយានដ្រូន ៨៣គ្រឿងរបស់រុស្ស៊ី ៕